Nadigar Thilagam Sivaji Ganesan - Part-15

[KCSHEKAR]

தில்லானா மோகனாம்பாள் திரைப்படத்திலிருந்து புகைப்படத்தை 15-ஆம் பாகத்தின் முதல் பதிவாக பதிவிட்டதால், அத்திரைப்படம் பற்றிய சில தகவல்களைப் பதிவிட விரும்புகிறேன். (பல மீள் பதிவாக இருந்தாலும்)

தில்லானா மோகனாம்பாள் திரைப்படத்தைப் பற்றி நான் ஏற்கனவே பலமுறை குறிப்பிட்டிருக்கிறேன். நான் பிறந்து வளர்ந்த கிராமம் (ஒருங்கிணைந்த தஞ்சை மாவட்டம், தற்போதைய திருவாரூர் மாவட்டம்) நாதஸ்வர மற்றும் தவில் வித்வான்கள் நிறைந்த ஊர். சிறு வயதில் தில்லானா மோகனாம்பாள் பார்த்துவிட்டு அதன் பின்னர் கோவில் திருவிழாக்களில் வாசிக்கும் நாதஸ்வரக் கலைஞர்களைப் பார்த்து (அவர்கள் பெரிய புகழ்பெற்ற கலைஞர்களாக இருப்பார்கள்) சிவாஜி வாசிப்பதுபோல இவர்களால் வாசிக்க இயலாது என்று ஒரு விவாதமே செய்த நினைவுகள் இன்றும் என் நினைவில் பசுமையாக நிழலாடுகிறது. என்னைப் பொறுத்தவரை First Impression is the best Impression என்பது போல, எனக்குப் பிடித்த திரைப்படங்களை வரிசைப்படுத்தச் சொன்னால் அதில் முதலிடம் பிடிப்பது தில்லானா மோகனாம்பாள் தான்.

கடந்த 2008 ஆம் வருடம், சிவாஜி - ஒரு வரலாற்றின் வரலாறு என்ற நூலிற்காக மிருதங்க வித்வான் உமையாள்புரம் சிவராமன் அவர்களை சந்தித்தேன். அப்போது அவர் மிருதங்கச் சக்கரவர்த்தி திரைப்படத்தைப் பற்றி குறிப்பிட்டார். மிருதங்கச் சக்கரவர்த்தி திரைப்படத்தில் சிவாஜிக்காக மிருதங்கம் வாசித்தேன். அதற்கு முன்னதாக நான் வாசித்த கச்சேரிக்கு வந்து முன்வரிசையில் வந்திருந்து அமர்ந்து நான் வாசிப்பதை கூர்ந்து கவனித்தார். திரைப்பட ஷூட்டிங் நடக்கும் இடத்திற்கும் என்னை வரவழைத்தார். ஒவ்வொரு ஷாட் முடிந்தவுடனும் என்ன வாத்தியார் சரியாக இருக்கிறதா என்று கேட்டுக்கொள்வார். அவருடைய Sincerity ஐ எண்ணி வியந்தேன். மிருதங்கச் சக்கரவர்த்தி திரைப்படம் வெளியான பிறகு கச்சேரிகளில் வாசிக்கும்போது பல பேர் என்னிடம் வந்து என்ன இருந்தாலும் சிவாஜி வாசித்த மாதிரி இல்லை என்று சொல்லுவார்கள். அப்போதுதான் எனக்குத் தெரிந்தது அவருடைய சின்சியாரிட்டியின் ரகசியம் என்று உமையாள்புரம் சிவராமன் நடிகர்திலகத்தைப் பற்றி குறிப்பிட்டார்.

அப்போது புரிந்தது தில்லானா மோகனாம்பாளில் நடிகர்திலகத்தின் நாதஸ்வர வாசிப்பில் நாம் ஏன் ஈர்க்கப்பட்டோம் என்று.

[KCSHEKAR]

[KCSHEKAR]

[KCSHEKAR]