kavidhaikku kavidhai matrum Pattuku pattu-2

**pavalamani pragasam** · 14th January 2011, 08:34 AM

மேகம் போல் கூந்தல் என்றால்
மின்னல் போல் அதில் மல்லிகை
மனதில் பெய்திடும் தேன்மழை
மத்தளம் தட்டி நடக்கும் கச்சேரி

**Google Adsense** · 14th January 2011 08:34 AM

**venkkiram** · 14th January 2011, 09:22 AM

கச்சேரி வைக்கலாம்
கதாகலட் சேபம் வைக்கலாம்
ராம நாடகம் வைக்கலாம்
பரத நாட்டியம் வைக்கலாம்
பட்டி மன்றம் வைக்கலாம்
பவானி அம்மன் திருவிழாவுக்கு
பஞ்சாயத்து தீர்வு சொல்ல
பல மணி நேரமானாலும்
பல்லு போன பெரிசு முதல்
ஜொள்ளு விடும் சிறுசு வரை
ஒரு மனதா ஒப்புக்கு வந்தது
ரெக்கா டான்ஸ்.

**pavalamani pragasam** · 14th January 2011, 02:50 PM

டான்ஸ் ஆடும் கரடி
பல்டி அடிக்கும் குரங்கு
க்ளாப் பண்ணும் கோமாளி
ரைம் சொல்லும் பொம்மை
ஆஹா ஆனந்த உலகம்
மறுபடியும் மழலையானேன்

**jaiganes** · 14th January 2011, 11:16 PM

Originally Posted by pavalamani pragasam

டான்ஸ் ஆடும் கரடி
பல்டி அடிக்கும் குரங்கு
க்ளாப் பண்ணும் கோமாளி
ரைம் சொல்லும் பொம்மை
ஆஹா ஆனந்த உலகம்
மறுபடியும் மழலையானேன்

மழலையானேன் மறுபடி என்கண்மணியின்
கிள்ளையின் தமிழ் கேட்டு.
தாய் ஆனேன் தனியாய் அவள் தூங்கும் போது.
தனியன் ஆனேன் நான் மட்டும் உண்ணும் போது.
பனியும் ஆனேன் அவள் கனவின் இரவுகளில்.
வெறுமை ஆனேன் அவள் இல்லாத இல்லத்தில்.

**venkkiram** · 15th January 2011, 04:08 AM

இல்லத்தில் தனிமை கண்டு வெறுத்துப் போகுது பெருசுக்கு
ஈன்றெடுத்த ஒன்றோ அசலூரில் குப்பை கொட்டுது காசுக்கு
வெப்கேமில் வாரம் ஒருவாட்டி பேரன் பேத்தி தரிசனம்
வெளங்காத வயதில் ஏங்கித் தவிக்கும் உள்மனம்
முதியோருக்கு ஏற்றதென்றும் முதியோர் இல்லமே
ஊன்றுகோல் அமையப்பெற்றால் இல்லை துன்பமே.

**pavalamani pragasam** · 15th January 2011, 07:02 AM

துன்பமே தூரப் போ
மழலைப் பட்டாளம் சூழ
குளத்தில் குளித்தெழுந்து
நண்டும் நானும் தின்று
போட்டிகள் விளையாடி
சிறு சிப்பிகள் பொறுக்கி
சுற்றத்துடன் சுற்றும்
இனிப்பான நாள் இன்று

**venkkiram** · 15th January 2011, 09:57 AM

இன்று அறுவடைத் திருநாளாம்
இயற்கையை வணங்கிக் கொள்வோம்
செயற்கை உரங்களை அறவே துறப்போம்
மண்ணின் வளத்தை மீட்டெடுப்போம்
மக்களின் வாழ்வை நீட்டிப்போம்
அன்பே எங்கும் எதிலும் ஆக்ஸிஜன் ஆகட்டும்
புவி வெப்பத்தை இனி அதுவே தணிக்கட்டும்
இழையோடி வரும் சகோதரத்துவம் இனிதே தொடரட்டும்
புரையோடும் வகுப்புவாதம் வழி தெரியாமல் மறையட்டும்

**pavalamani pragasam** · 15th January 2011, 08:30 PM

மறையட்டும் மனதின் குறைகள்
உறங்கட்டும் களைத்த விழிகள்
மலரட்டும் மற்றொரு பொன்னாள்
மரபுகள் மறவா புதிய பாதைகள்
காட்டும் ஏற்றங்கள் வளர்பிறை
கனவுகள் கைகூடும் காலங்கள்
காத்திருந்து பறிக்கும் நற்கனிகள்
இப்பிறவியின் பெரும்பயன்கள்

**jaiganes** · 17th January 2011, 05:51 AM

பெரும்பயன்கள் கிடைத்திடவே பலகாலம் பொறுத்திருந்தேன்.
பலர் வாட பலம்பெற்றவர் அறம் அழித்து பெருவாழ்வை
பெற்று பெற்றியுடன் பவனிவர, சகோதரர் சுவரின்றி
சிறையுற்றார், சிறுசெயல்கள் பலதாங்கி உயிர்மட்டும்
உடைமையென்று உணர்வொன்றும் ஏந்தாமல் உடல்களாய்
வாழ்கின்றனர். தனல் வெப்பம் உணவென்று மேடைகளில்
முழங்கி விட்டோம். யூட்யூபில் தினமொரு புதுப்பதிவு.
ஆறே பேர் இறந்தனர் அமெரிக்காவே அழுதது.
ஊரூராய் இறந்தனரே எம்மவர். கேளிக்கைக்
காட்சிகளும், அதை விடக்கேளிக்கையாய்க்கட்சிகளும்
எழுப்பிய கோஷங்களில் கும்பலாய்ப்போய் சேர்ந்தவர் குரல்கள்
கேட்கவில்லை எங்களுக்கு!
சகோதர ரத்தத்தில் புது பொங்கலும் பொங்குது.
நிகழ்ச்சிகளின் நிரலில் இலங்கையில் மடிந்தோர்க்கு
சம்பிரதாயமாய் வடிக்கும் கூட்டங்களுக்குக்கூட்டமில்லை
போலும். அது வேறு நாடு.
மண்ணில் தானே எல்லைக்கோடுகள்...
ஓ தேசபக்தி எங்கள் மனதிலும்
எல்லைகள் இட்டுவிட்டது ஈசா!
அழிப்பதற்கு அகிம்சையேனும் சரி ஆணையிடு!
இருக்கிறாயோ இல்லையோ,
உனக்குப்புண்ணியமாய்ப்போகட்டும்.