Quote:
"சின்னத்திரை நிகழ்ச்சிகளில் வித்தியாசமானது, புதுமையானது என்ற பெயரை எடுத்த எடுப்பிலேயே பெற்றிருக்கும் நிகழ்ச்சி, ஆயிரத்தில் ஒருவன். நேயர்களின் தனித்திறனை புடம் போட்ட பொன்னாக வெளிக்கொணர்ந்து அதற்குப் பரிசும் வழங்கும் இந்த நிகழ்ச்சியில் போட்டியாளர்களின் தனித்துவம் தெரிகிறது. பொதுஅறிவில் அவர்கள் அற்புதமாகத் தேர்ந்திருப்பது மகிழ்ச்சி தருகிறது'' என்கிறார், நடிகை மந்த்ரா.
25 எபிசோடைத் தாண்டி ஜி தமிழில் தொடரும் ஆயிரத்தில் ஒருவன் நிகழ்ச்சியில், இப்போது பங்கேற்று நேயர்களுடன் உரையாடுபவர் நடிகை மந்த்ரா., ரசிகர்களின் நெஞ்சில் நிறைந்த அதே மந்த்ரா தான். இப்போது 8 ஆண்டுகள் இடைவெளியில் இப்போது சின்னத்திரையில் அடியெடுத்து வைத்திருக்கிறார்.
"நிஜமாகவே நான் எதிர்பார்த்திராத அனுபவங்கள் இந்த நிகழ்ச்சியில் கிடைக்கிறது. இதில் கவிதை பற்றியும் பேசலாம். சமையல் பற்றியும் பேசலாம். எது பற்றியும் பேசலாம். இந்த வாரம் மதுரை பற்றி பேசினோம். மதுரை என்றாலே மல்லி, மீனாட்சியம்மன் கோவில், ஆயிரங்கால் மண்டபம் நினைவுக்கு வரும். ஆனால் போட்டியாளர்களிடம் பேசும்போது மதுரை பற்றி அதற்கு மேலும் எத்தனையோ சிறப்புக்களை தகவல்களாக கொட்டினார்கள். இந்த நிகழ்ச்சி மூலம் மீண்டும் ரசிகர்களுடனான என் பிணைப்பு இப்போது இன்னும் இறுகியிருக்கிறது. அந்தவிதத்திலும் இந்த நிகழ்ச்சி எனக்கு ஸ்பெஷல்'' என்கிறார், மந்த்ரா.
டைரக்டர் நிவாசை திருமணம் செய்து கொண்டு குடும்ப வாழ்க்கைக்குப் போனவரை இந்த நிகழ்ச்சியின் சுவாரசியம் அழைத்துக் கொண்டு வந்திருக்கிறது.
"நேயர்களின் பங்களிப்பில் சுவாரசியம் கொட்டிக் கிடக்குமே?''
மந்த்ராவைக் கேட்டால், "உண்மை. அவர்கள் திறமை பார்த்து நானே பிரமித்து விட்டேன். குறிப்பாக கவியரசர் கண்ணதாசனை பற்றி பேச்சு வந்தபோது, பாடல்களை அவர் எந்தெந்த சூழலில் எழுதினார் என்ற தகவல்களை அவர்கள் உற்சாகமாய் தந்தார்கள். இத்தனை விஷயம் கவியரசர் பற்றி தெரிந்து வைத்திருக்கிறார்களா என்று வியப்பு ஏற்பட்டது. அவரின் ஆழ்ந்த புலமை எப்படி சூழ்நிலையோடு இணைந்திருந்தது என்பதில் வியப்பும் ஏற்பட்டது. புதிய விஷயங்களை தெரிந்து கொள்ள இது நல்ல மேடை'' என்கிறார்.
"மீண்டும் பெரியதிரைக்கு எப்போது வருகிறீர்கள்?''
"ஏற்கனவே தெலுங்கில் `மங்கா' என்ற படத்தில் டைட்டில் ரோலில் நடித்து வருகிறேன். தமிழிலும் ஒரு படத்தில் நடிக்கிறேன். அதுபற்றிய அறிவிப்பு விரைவில் வரும். தவிரவும் தெலுங்கு ஜி டிவியில் `லக்கு கிக்கு' என்ற பரிசுப்போட்டி நிகழ்ச்சியையும் நடத்தி வந்ததால் ரசிகர்களுடன் எப்போதும் தொடர்பில் தான் இருக்கிறேன். இந்த நிகழ்ச்சி மூலம் தமிழ் ரசிகர்களுடன் எனக்கு நேரடித்தொடர்பு ஏற்படுத்திக் கொடுத்த நிகழ்ச்சித் தயாரிப்பாளர் அபர்ணா பிள்ளை என்றும் என் நன்றிக்குரியவர்.''
ஆயிரத்தில் ஒருவன் நிகழ்ச்சி ஜி தமிழ் தொலைக்காட்சியில் வியாழன், வெள்ளிக்கிழமைகளில் இரவு 9.30 மணிக்கு ஒளிபரப்பாகிறது
.