Originally Posted by Murali Srinivas
நடிகர் திலகம் நினைவு நாள் நிகழ்ச்சி - Part II
முதலில் சிறப்பு அழைப்பாளர்களைப் பற்றிய ஒரு அறிமுகம் என்ற முறையில் திரு.அருணன் பேசினார். முதல் முதலாக உயர்ந்த மனிதன் படத்தின் படப்பிடிப்பில் நடிகர் திலகத்தை சந்தித்த நாளை நினைவு கூர்ந்து அன்று முதல் அவரோடு இறுதி வரை நெருங்கி பழகியதையும் சொன்ன அருணன் கூடியிருந்த இளைய தலைமுறையினரைப் பார்த்து உணர்ச்சிவசப்பட்ட நிலையில் நடிகர் திலகத்தைப் பற்றிய விழாக்கள் தொடர்ந்து நடத்த வேண்டிய அவசியத்தை சுட்டிக் காட்டினார். நடிகர் திலகத்தின் நூற்றாண்டு விழா வரும் போது தங்களைப் போன்றவர்கள் இருக்க மாட்டோம் என்றும் ஆகையால் இளைஞர்கள் இந்த பணியை மேற்கொள்ள வேண்டும் என்றும் குறிப்பிட்டார். தான் ஒரு அரசு ஊழியனாக வணிக வரி துறையில் வேலை பார்த்ததை குறிப்பிட்ட அவர் பாடியில் அமைந்துள்ள சிவசக்தி பாண்டியனின் சிவசக்தி தியேட்டரில், தான் சோதனை நடத்த போன நிகழ்வுகளை நகைச்சுவையாக குறிப்பிட்டார். நடிகர் திலகம் உரிமையோடு நண்பர்களை அழைக்கும் முறையை ரசித்துக் குறிப்பிட்ட அவர் பின்னர் சிறப்பு அழைப்பாளர்களைப் பற்றி ஒரு அறிமுகமும் கொடுத்து தன் உரையை நிறைவு செய்தார்.
அடுத்து எல்லோரையும் வரவேற்று பேசியது சிவாஜி மன்ற தலைவரான பூமிநாதன் அவர்கள். அவருக்கு பின் நிகழ்ச்சி அமைப்பாளரும் துஷ்யந்த் மன்ற தலைவருமான நாஞ்சில் இன்பா மைக் முன் வந்தார். தொடங்கும் போதே தனது தமிழ் ஆசானும் குருவுமான நடிகர் திலகத்திற்கு ஒரு மாணவன் செய்யும் மரியாதை என்று குறிப்பிட்ட இன்பா தங்கள் மாவட்டத்தின் பெருமையை அடிக்கடி முழங்கினார். தமிழ் பாடங்களில் மதிப்பெண் குறைத்து வாங்கியதையும் எப்படி நடிகர் திலகத்தின் தமிழ் வசனங்கள் தமிழ் மீதான காதலை வளர்த்தது என்பதையும் சுவைப் பட கூறிய இன்பா, பெருந்தலைவரை தங்களைப் போன்ற இளைஞர்கள் ஏற்றுக் கொண்டதற்கு முழு முதற் காரணம் சிவாஜிதான் என்றார். இதை சொல்லி விட்டு இன்பா அடுத்து குரல் உயர்த்தி ஒரு செய்தி சொன்னார். "எங்கள் தெருவில் ஏன் எங்கள் ஊரில் உள்ள வீடுகளில் நடிகர் திலகம் தவிர வேறு எந்த நடிகனின் புகைப்படமும் பார்க்க முடியாது. அது போல் தலைவர்களில் பெருந்தலைவரின் படம் மட்டுமே இருக்கும்" என்று சொன்னபோது அரங்கத்தில் அதிரடி கைதட்டல். உணர்ச்சி வசப்பட்ட நிலையில் பேசிய இன்பா தங்களைப் போன்ற இளைஞர்கள் சிவாஜியின் புகழை என்றும் பரப்புவோம் என கூறி நிறைவு செய்த போது அரங்கம் அவருக்கு உரத்த குரலில் மரியாதை செலுத்தியது.
அடுத்து வந்தவர் திருச்சியை சேர்ந்த வேங்கை சந்திரசேகர். திருச்சி சிவாஜி மன்றத்தை சேர்ந்த இவர் நடிகர் திலகத்துடன் நெருங்கி பழகும் வாய்ப்பு பெற்றவர். முதலில் அமைதியாக பேச ஆரம்பித்தவர் பின்னர் வேகம் எடுத்தார். திருச்சியில் கல்லூரியில் தான் தமிழ் மன்ற செயலாளராக இருந்ததையும் மன்ற விழாவிற்கு கண்ணதாசனை வரவழைத்ததையும் சொன்னார். கண்ணதாசன் அன்று கம்ப ராமாயணத்தைப் பற்றி பேசியதை நினைவு கூர்ந்த அவர்,கண்ணதாசன் சொன்ன ஒரு உவமையை பற்றி சொன்னார். அனுமன் சீதையை அசோகவனத்தில் சந்தித்து விட்டு ராமரிடம் காட்டுவதற்காக கணையாழியையும் பெற்று கொண்டு அவரிடம் சொல்வதற்கான செய்தியை கேட்கும் போது திருமண இரவில் ராமன் சீதையிடம் சொன்ன இனி சிந்தையிலும் பிறிதொரு மாதை [பெண்ணை] தொடேன் என்ற கம்பனின் வரிகள் கவிஞரின் மனதில் ஆழமாக பதிந்து போனதாகவும் அதை சந்தர்ப்பம் அமைந்த போது உன்னையல்லால் ஒரு பெண்ணை இனி நான் உள்ளத்தினாலும் தொட மாட்டேன் என்று எழுதி வைத்தாராம். எந்த நாயகன் பாடினால் இது எடுபடும் என்று பார்த்த போது நடிகர் திலகம் மட்டுமே கண்ணுக்கு தெரிந்தார் ஆகவேதான் அதை வசந்த மாளிகை படத்திற்கு பயன்படுத்திகொண்டதாகவும் கண்ணதாசன் குறிப்பிட்டதை திரு சந்திரசேகர் சொன்ன போது கூட்டம் அதை ஆவேசத்தோடு வரவேற்றது. இந்த கம்ப ராமாயண காட்சிகளை விவரிப்பதில் அதிக நேரம் எடுத்துக் கொண்ட சந்திரசேகர் அத்துடன் நன்றி கூறி விடை பெற்றார்.
(தொடரும்)