சித்ரா பௌர்ணமி - ஒரு மீள் பார்வை - Part I
வெகு நாட்களுக்குப் பின் ஏன் பல வருடங்களுக்கு பிறகு இந்தப் படத்தை revisit செய்யும் சந்தர்ப்பம் அமைந்தது. காரணம் ஒரு நண்பர். இத்தனை வருடங்களுக்கு பிறகு பார்த்தபோது தோன்றிய எண்ணங்களை பகிர்ந்துக் கொள்ளவே இந்த பதிவு.
கதை என்னவோ பழி வாங்கும் கதைதான். பெற்றோர்களை தன கண் முன் கொலை செய்த வில்லனை பழி வாங்க துடிக்கும் நாயகன் என்று பார்த்து பழகிய கதைதான். ஜமின்தார் காலத்திய பழசு என்பதனால்தான் என்னவோ கதையின் பின்புலமும் ஜமீன் ஜமின்தார் என்றே சுற்றி வருகிறது. ஆனால் மலைப்பிரதேச கிராமம் என்று களத்தை தீர்மானித்திருப்பது வித்தியாசம். அந்த மலைப்பிரதேச கிராமத்தை திரையில் காட்ட அவர்கள் எடுத்துக் கொண்ட இடமோ காஷ்மீர் என்ற வகையில் கொஞ்சம் வேறு மாதிரியாக சற்று பிரம்மாண்டமாகவே யோசித்திருக்கிறார்கள் என சொல்ல வேண்டும்.
ஏழைகள் வாழும் குடிசைப் பகுதியை தன் சுய தேவைக்கு எடுத்துக் கொள்ள அதிகாரத்தையும் வன்முறையையும் பயன்படுத்தும் ஜமின்தார், அவரின் நடவடிக்கையை எதிர்த்து தன் இடத்தை விட்டுக் கொடுக்க மறுக்கும் பைரவன். அவனுக்கு ஒரு மகன். மனைவி நிறைமாத கர்ப்பிணி. நேரில் வரும் ஜமின்தார் தன் குதிரைக் காலால் பைரவனை கொன்று விடுகிறார். பெண் குழந்தையை பெற்றெடுக்கும் அவன் மனைவி. அவள் படுத்திருக்கும் கூடாரம் தீ வைத்துக் கொளுத்தப்படுகிறது.
அங்கிருக்கும் வைத்தியர் இரண்டு குழந்தைகளையும் காப்பாற்றுகிறார். சித்ரா பௌர்ணமியன்று கொல்லப்பட்ட இருவரின் உடல்களையும் அருகருகே புதைக்கும் சிறுவன் செங்கோடன் ஜமின்தாரை பழி வாங்குவதற்காக சபதம் மேற்கொள்கிறான். பழிவாங்கும் உணர்ச்சி தன் மனதை விட்டு மறையக் கூடாது என்பதற்காகவே தன் கையிலும் தன் தங்கையின் கையிலும் சூடு வைத்துக் கொள்கிறான்.
ஜமின்தாரை கொலை செய்ய முயற்சி செய்யும் சிறுவன் செங்கோடனையும் அவன் தங்கையையும் ஜமிந்தாரின் ஆட்கள் துரத்த இருவரும் பிரிந்து விடுகின்றனர். மயங்கி விழுந்த சிறுமியை மற்றொரு ஜமீன் வாரிசிடம் போய் சேருகிறாள். .காலம் உருண்டோடுகிறது. செங்கோடன் இப்போது வாலிபன். தன் சபதத்தை முடிக்க முடியாமல் பழி வாங்கும் வெறியோடு அலைந்து திரிகிறான். வழி பிரிந்த தங்கை விஜயா சின்னமலை ஜமிந்தாரின் தங்கையாக் வளர்க்கப்பட்டு பெரிய ஜமிந்தாரின் மகன் குமாருக்கே மனம் செய்துக் கொடுக்கபடுகிறாள். அவர்களுக்கு ஒரு மகன். ஜமிந்தாரின் ஒரே பெண் வாரிசு ராணி. செங்கோடனிடம் முதலில் மோதும் அவள் பின் அவனிடம் மனதை பறிகொடுத்து அவனை பின் தொடர்ந்து அவனிடம் மாட்டிக் கொண்டு ஒரு கட்டத்தில் அவனை விட்டு பிரிய மாட்டேன் என அடம் பிடித்து செங்கோடனுக்கே மனைவியாகிறாள். இதற்கிடையில் தன்னை விட்டுப் பிரிந்த தன் தங்கை தன் எதிரி ஜமிந்தாரின் மருமகளாக வாழ்ந்துக் கொண்டிருக்கிறாள் என தெரிந்துக் கொள்ளும் செங்கோடன் அதை அவளிடம் வெளிப்படுத்துகிறான்.
ஒரு புறம் தன் தந்தையையும் காப்பாற்ற வேண்டும் தன் கணவனும் கொலைகாரனாவதை தடுக்க வேண்டும் என்று போராடும் செங்கோடனின் மனைவி ராணி, மற்றொரு புறம் தன் மாமனாரின் உயிரும் பிழைக்க வேண்டும், அண்ணனுக்கும் ஒன்றும் ஆகி விடக்கூடாது என்று பல வழிகளில் முயற்சிக்கும் செங்கோடனின் தங்கை விஜயா, தன் தந்தையை பழி வாங்க துடித்துக் கொண்டிருக்கும் செங்கோடன் தன் மனைவியின் அண்ணன் என்று தெரிந்ததும் எந்த பக்கமும் பேச முடியாமல் தவிக்கும் ஜமிந்தாரின் மகன் குமார், செங்கோடனுக்கு உதவி செய்யும் சின்ன ஜமீன், சபதத்தை எப்படியும் நிறைவேற்றிட துடிக்கும் செங்கோடன், அவனை எப்படியும் கொல்ல வேண்டும் என்று துடிக்கும் ஜமின்தார் இப்படி உணர்ச்சிக் குவியலான பிரச்சனைகளுக்கு முடிவு காண்கிறது கிளைமாக்ஸ். .
(தொடரும்)
அன்புடன்