Quote:
மைதிலி
கலைஞர் தொலைக்காட்சியில் திங்கள் முதல் வெள்ளி வரை தினமும் பகல் 1.30 மணிக்கு ஒளிபரப்பாகி வரும் புதிய தொடர், `மைதிலி'.
பொறுமையில் பூமியாகவும், கருணையில் வானமாகவும் வளர்பவள் மைதிலி. பிறப்பிலேயே தன் தாயை இழந்து பின் சித்தியின் கொடுமையில் வளர்ந்தவள்.
நாயகன் ராம் பிரசாத் சாதாரண குடும்பத்தில் பிறந்து தன் கடுமையான உழைப்பால் மிகப் பெரிய உயரத்தை தொட்டவன்.
காலம் ராம் பிரசாத்-மைதிலியை இணைத்து வைக்கிறது. சந்தோஷமான அவர்களது வாழ்க்கையில் விதி விளையாடுகிறது. ஒரு கட்டத்தில் ராம் பிரசாத் தீவிரவாதிகளால் கடத்தப்பட்டு சுய நினைவை இழக்கிறான். தனியான மைதிலி இந்த சமூகத்தில் புறக்கணிக்கப்படுகிறாள்.
சங்கீதத்தில் தேர்ந்த மைதிலி தன் முயற்சியில் திரை உலகில் மிக பெரிய பாடகியாகிறாள். தன்னை உதாசீனப்படுத்திய குடும்பத்தை ஒரு தாய் போல் தாங்குகிறாள். தன் கணவன் ராம் பிரசாத்தை தேட ஆரம்பிக்கிறாள். ராம் பிரசாத் என்ன ஆனான்? கணவன்- மனைவி சந்தித்தார்களா? இப்படி பல முடிச்சுகளுடன் கதை நகர்கிறது.
கதை காஞ்சீபுரத்தில் ஆரம்பித்து சென்னை, மலேசியா, சிங்கப்பூர் என்று பறக்கிறது.
`நீ மன்னவனா சின்னவனா சொல்லி விடும் பிறப்பு
நீ நல்லவனா கெட்டவனா சொல்லி விடும் இறப்பு' என கவிஞர் கண்ணதாசன் எழுதிய பாடல் பின்னணியில் உருவான கதை இது.
மீடியா மாஸ்டர்ஸ் பேனரில் டாக்டர் ஸ்ரீதர் நாராயணன், திருமதி விஜயா தயாரிக்கிறார்கள். வசனம் பாலமுருகன். இசை எஸ்.பி.வெங்கடேஷ். பின்னணி இசை எஸ்.பி.பூபதி. கதை- திரைக்கதை, இயக்கம்: எம்.விஸ்வநாத்.
ராம் பிரசாத்தாக அஜய், மைதிலியாக சுஜிதா, சித்தியாக வடிவுக்கரசி, மற்றும் சண்முக சுந்தரம், ஓ.ஏ.கே.சுந்தர், தீபாவெங்கட், கிரி, பாரதி கண்ணன், எல்.ஐ.சி.நரசிம்மன், சிலோன் மனோகர் நடிக்கிறார்கள்.