Quote:
ஒரு நிரந்தரப் பாடம்!
அது ஒரு மாலை நேரம்... மணி நான்கைக் கடந்திருந்தது. அந்த மாபெரும் நடிகரின் வீட்டுக்கு வளரும் ஒரு நடிகரை அழைத்துச் சென்று, இருவரையும் உரையாட வைத்து, அந்தச் சந்திப்பை வாசகர்களுக்கு ஒரு படைப்பாக அளிக்க வேண்டுமென்பது திட்டம்.
அந்தப் பெரும் நடிகர், புகழ் மலைத் தொடரின் எல்லாச் சிகரங்களையும் தொட்டவர். அதனால் அவரை சந்தித்து உரையாடுவதைத் தனது பேறாக நினைத்தார் இளம் நடிகர். இந்தச் சந்திப்பினைப் பதிவு செய்ய, நமது சினிமா எக்ஸ்பிரஸின் ஆசிரியர் குழுவிலிருந்து ஒருவர் உடன் சென்றிருந்தார்.
அந்த நிகழ்வின்போது இளம் நடிகரையும், நமது உதவி ஆசிரியரையும் அந்த முதுபெரும் நடிகர் வரவேற்ற விதமும், உபசரித்த விதமும், காட்டிய அடக்கமும் காலத்தாலும் அழிக்க முடியாத கல்வெட்டுகள்!
"தான் இத்தனைப் படங்களில் நடித்துள்ள ஒரு சீனியர்' என்னும் உணர்வு சிறிதும் இன்றி அவர் நடந்து கொண்ட பண்பினை விவரிக்க, வார்த்தைகளே இல்லை எனலாம்.
அப்படிப்பட்ட ஓர் குணவான் யாரென்பதை இந்நேரம் வாசகர்கள் அனைவர்களுமே ஊகித்திருப்பீர்கள். ஆம்! திரையில் வில்லனாகத் தோன்றியபோதும் நிஜ வாழ்வில் ஒழுக்க சீலராக, குழந்தை மனம் கொண்டவராக, தற்பெருமை பேசாத பெருந்தகையாளராக, விருந்தோம்பலில் ஒப்பற்றவராகத் திகழ்ந்தவர் எம்.என்.நம்பியார்.
"திரைத் துறையில் எளிதில் கெட்டுப் போக வாய்ப்புண்டு' என்ற கருத்து, பொதுமக்கள் பலரிடம் உண்டு. ஆனால் இந்த எண்ணம் முற்றிலும் உண்மையானதல்ல. எப்படி சமுதாயத்தின் எல்லாத் துறைகளிலுமே ஆங்காங்கே சில சீர்கேடுகள் உண்டோ, அதுபோலத்தான் திரைத் துறையிலும்! ஆனால் திரையுலகத்தினர் புகழ் என்னும் வெளிச்சத்திலேயே எப்போதும் நின்று கொண்டிருப்பதால் அவர்களின் சின்னஞ்சிறு அசைவுகளும் கண்காணிக்கப்படுகின்றன! விமர்சிக்கப்படுகின்றன!
ஆயின் அத்திரையுலகிலும், "ஒழுக்கத்தின் ஒல்கார் உரவோர்' என்ற வள்ளுவர் வாய் மொழிக்கேற்ப வாழ்பவர்கள் உண்டு. அவர்களின் "குரு சுவாமி'யாக விளங்கிய நம்பியாரின் வரலாறு, வளரும் கலைஞர்களுக்கெல்லாம் ஒரு நிரந்தரப் பாடம்.