சகஸ்ரநாமம் சகோதரி காலமானார்
சென்னை, மார்ச் 20: பிரபல நாடக மற்றும் திரைப்படக் கலைஞர் மறைந்த எஸ்.வி.சகஸ்ரநாமத்தின் சகோதரி எஸ்.வி.கிருஷ்ணம்மாள் (92) வியாழக்கிழமை சென்னையில் இயற்கை எய்தினார். "சேவா ஸ்டேஜ்' என்ற பெயரில் நூற்றுக்கணக்கான சமூக விழிப்புணர்வு நாடகங்களை அரங்கேற்றிய எஸ்.வி.சகஸ்ரநாமம் "பராசக்தி', "வாழ்க்கை', "நல்லதம்பி', "பைத்தியக்காரன்' உள்பட ஏராளமான திரைப்படங்களிலும் நடித்தவர். அவருடைய கலைப்பணிக்கு உற்ற துணையாக இருந்தவர் எஸ்.வி.கிருஷ்ணம்மாள்.
மறைந்த கிருஷ்ணம்மாளுக்கு கவிஞர் வைத்தீஸ்வரன் என்ற மகனும் தைலம்மாள் என்ற மகளும் உள்ளனர். அவருடைய மறைவுக்கு எழுத்தாளர்கள் அசோகமித்திரன், இந்திரா பார்த்தசாரதி, சச்சிதானந்தம், கூத்துப்பட்டறை நா.முத்துசாமி உள்ளிட்ட ஏராளமான இலக்கியவாதிகள் நேரில் வந்து அஞ்சலி செலுத்தினர்.