Quote:
வில்லனே இல்லாத புதிய தொடர் -`உறவுகள்' சன் டிவி
`அகல்யா', `பந்தம்' - வெற்றித் தொடர்களைத் தொடர்ந்து சேன் மீடியா நிறுவனம் தயாரிக்கும் புதிய மெகா தொடர் `உறவுகள்'. இந்தப் புதிய தொடர் சன் டிவியில் வரும் திங்கள்கிழமை முதல் ஒளிபரப்பாகிறது.
`அகல்யா' தொடரில் ஆண்-பெண் நட்பை கதைக்கருவாகக் கையாண்டிருந்தனர். `பந்தம்' தொடரில் தோழிகள் இருவரின் வேறு, வேறு மன உணர்வுகளை அழுத்தமாகப் பதிவு செய்ததோடு, சின்னத்திரையில் காலையில் ஒளிபரப்பாகும் தொடர்களில் கதாநாயகியை முதன் முதலில் இரட்டை வேடத்தில் நடிக்க வைத்தனர்.
தற்போது `உறவுகள்' தொடரில் ஒரு கூட்டுக் குடும்பத்தை கதைக்களமாகக் கையாண்டு உள்ளனர். இன்றைய நாகரீக உலகில் கூட்டுக் குடும்பத்தின் அருமையும், தேவையும் முற்றிலுமாக மறைந்து விட்டது என்றே சொல்லலாம். கணவன், மனைவி ஒரே வீட்டில் வாழ்ந்தாலும் அவர்கள் கூட மனதளவில் தனித்தனி மனிதர்களாகவே உலா வருகின்றனர்.
இன்னும் சில வருடங்களில் கூட்டுக் குடும்பம் என்றால் என்ன என்பதே இன்றைய இளைய சமுதாயத்தினருக்குத் தெரியாமல் போய்விடும் அபாயத்தில் நாம் இருக்கிறோம் என்பதை மனதில் கொண்டு, கூட்டுக் குடும்பத்தின் அவசியத்தை உணர்த்தும் வகையில் இத்தொடரின் திரைக்கதை அமைக்கப்பட்டுள்ளது.
இந்தத் தொடரில் வரும் அனைத்துக் கதாபாத்திரங்களும் நல்ல மனது கொண்டவர்கள். வழக்கமாக தொலைக்காட்சி தொடர்களில் இடம் பெற்றிருக்கும் வில்லன் கதாபாத்திரம், இத்தொடரில் இல்லை என்பதே இத்தொடரின் புதுமையாகும்.
இந்தத் தொடரில் புதுமுக கதாநாயகியாக பெங்களூரை சேர்ந்த அர்ச்சனா கிருஷ்ணப்பா அறிமுகமாகிறார். மேலும், பீலிசிவம், ஸ்ரீகுமார், அமரசிகாமணி, ராஜ்காந்த், ராமச்சந்திரன், வின்சென்ட்ராய், `அலைகள்' துர்கா, சிவகவிதா, ரேவதிசங்கர், ராஜேஸ்வரி, நித்யா, ஜெ.லலிதா, ஆர்த்தி, சுதா மற்றும் ஜெயந்த் ஆகியோரும் நடிக்கிறார்கள்.
கதை, சேன் மீடியா. திரைக்கதை: குமரேசன். வசனம்: சரவணன். பாடல்: கவிஞர் வைரமுத்து. முகப்புப் பாடல் இசை: டி.இமான். பாடியவர்: நித்யஸ்ரீ. பின்னணி இசை: கலைக்கதிர். இயக்கம்: எஸ்.ஹரிபாபு. தயாரிப்பு: சேன் மீடியா.
சன் டிவியில் திங்கள் முதல் வெள்ளி வரை தினமும் பகல் 12 மணிக்கு ஒளிபரப்பாகிறது. `உறவுகள்'.