Originally Posted by RAGHAVENDRA
சிவாஜி ரசிகர்களின் எந்த முயற்சிகளுக்கும் முதல் ஆதரவு தரும் சகோதரி சாரதா அவர்களின் கூற்றுப்படி முரளி சாரின் பதிவுகள் நிகழ்ச்சிகளைக் கண்முன்னே நிறுத்துகின்றன.
நம் அனைவரைவிடவும் துரோகிகளால் பாதிக்கப்பட்டது, நடிகர் திலகம் மட்டுமல்ல, அவரது குடும்பத்தாரும் தான் என்பதை நாம் மறந்து விடக் கூடாது. ஏனென்றால் நடிகர் திலகத்தின் அனைத்து வெற்றி தோல்விகளிலும் அவருடைய குடும்பத்தின் பங்கு உண்டு. அப்படி இருக்கும் போது தம் தந்தைக்கு துரோகம் இழைத்ததை பெருந்தன்மையுடன் மன்னித்து அவருடைய புதல்வர் நடிகர் திலகத்தின் பால் வைத்துள்ள அன்பை மதித்து அவரை அழைத்தது பெருந்தன்மையின மிகச் சிறந்த உதாரணம், இன்றைய திராவிடக் கலாச்சாரத்தில் காணப் படாத நாகரீகம். அந்த அடிப்படையில் ரசிகர்களின் உள்ள உணர்வையும் புரிந்து கொண்டு அதே அடிப்படையில் தேசிய உணர்வுக்கும் முக்கியத்துவம் கொடுத்து திரு ஜி.கே. வாசன் அவர்களை அழைத்தது மிகவும் பெருமை வாய்ந்த நிகழ்வாகும். இதற்கு நடிகர் திலகம் நிச்சயம் உளம் குளிர்ந்திருப்பார். காரணம், மன்னிக்கும் மனப்பான்மைக்கென்றே பிறந்தவர் அவர். அது மட்டுமல்ல பல சந்தர்ப்பங்களில் திரு மூப்பனார் அவர்களுடன் பல விழாக்களிலும் திருமணங்களிலும் நடிகர் திலகம் அவர்கள் கலந்து கொண்டிருக்கிறார். அப்படி பல புகைப்படங்களை நான் பார்த்திருக்கிறேன். நடிகர் திலகம் மறைவுற்ற போது மூப்பனார் உடல் தள்ளாமையிலும் வந்து அஞ்சலி செலுத்தியதும் வரலாறு.
ரசிகர்களைப் பொறுத்த வரை அவருடைய துரோகம் அப்படியே நெஞ்சில் நிலைத்து விட்டபடியால் அன்றைய விழாவின் துவக்கத்தில் சிறிது இறுக்கமான சூழ்நிலை இருந்தது. ஆனால் அந்த நிலையை சகஜமான நிலைக்கு மாற்றியது திரு வாசன் அவர்களுடைய உரை என்றால் அது மிகையில்லை. அவர் ஆணித்தரமாக நடிகர் திலகத்தின் பெருமையை பேசிய போது அதில் போலித்தனமோ மேடை அலங்காரமோ தென்படவில்லை. மாறாக இவ்வளவு காலம் தேசிய இயக்கங்கள் தலைதூக்க முடியவில்லையே என்ற ஏக்கமும், நடிகர் திலகத்தின் இவ்வளவு பெரிய ரசிகர் படையை பயன் படுத்தாமல் வி்ட்டோமே என்ற உணர்வும் தான் தென்பட்டது.
மேடைப்பேச்சுக்காக வாக்குறுதிகளை வழங்கி விட்டு பின்னர் அவற்றை செயல் முறையில் நடைமுறைப் படுத்த தயங்கும் அரசியல் வாதிகளைப் போல் தேசிய தலைவர்கள் இருக்க மாட்டார்கள். சொன்னதை நிச்சயம் செய்வதற்கான முயற்சிகளை மேற்கொள்வார்கள். இதில் வாசனும் விதி விலக்கல்ல. ஆகையால் மணிமண்டபம் என்றல்ல, நடிகர் திலகத்தின் புகழ் வேண்டி வைக்கக் கூடிய எந்தக் கோரிக்கையானாலும் நிறைவேற்றக் கூடிய மனநிலை கொண்டவர் வாசன்.
நாம் எத்தனையோ தலைவர்கள் நினைவிடங்களையும் பார்த்து வருகிறோம். சகோதரி சாரதா அவர்களுக்குத் தெரியாததல்ல. எத்தனை பேர் அவற்றைப் பயன் படுத்துகின்றனர். புறாக்கள் கூடு கட்டுவதற்கும் வௌவால்கள் தொங்குவதற்கும் தான் அவை பயன் படுகின்றன. நினைவு நாள் அல்லது பிறந்த நாள் இந்த இரு நாட்கள் மட்டும் தான் அவை பயன் படுத்தப் படுகின்றன.
அதே போல் சமாதி எடுத்துக் கொள்ளுங்கள். வந்து இரண்டு நிமிடம் அஞ்சலி செலுத்தி வி்ட்டுப் போய் விடுகிறோம். அத்தோடு அந்தத் தலைவருக்கு நாம் செலுத்தும் மரியாதை மீண்டும் அடுத்த பிறந்த அல்லது நினைவு நாளில் தான்.
இந்த நிலையே நடிகர் திலகத்தின் மணி மண்டபத்திற்கும் வரவேண்டும் என்றால் நாம் அவசரப் படலாம். உடனடியாக போராட்டம் நடத்தி அதை அமைத்து விட்டு மறுவேலை பார்க்கலாம்.
இதைத்தான் நாம் விரும்புகிறோமா. வருடத்திற்கு இரு நாட்கள் வந்து செல்வதற்கு மட்டும் தான் மணிமண்டபமா
தயவு செய்து சிந்தியுங்கள். உலகத்தில் யாருக்குமே இல்லாத சிறப்பு நடிகர் திலகத்திற்கு மட்டும் தான் உண்டு. அவரைப் பற்றிய ஆராய்ச்சி உலகெங்கும் நடந்து வருகிறது. உலகின் பல பல்கலைக்கழகங்களில் நடிகர் திலகத்தின் நடிப்பு ஆராய்ச்சிகளிலும் திரைத்துறை தொடர்பான நூல்களிலும் இடம் பெறுகிறது. அவருடைய நடிப்பைப் பார்த்து நடிக்கக் கற்றுக் கொள்ள விழைவோர் தலைமுறைகளைத் தாண்டி உள்ளனர்.
அவர்களு்க்கு உதவுவது நம்மைப் போன்ற தலைமுறையினரின் ரசிகர்களின் கடமையல்லவா.
நடிகர் திலகத்திற்கு மிகச் சிறந்த முறையில் ஒரு நினைவிடம் அமைய வேண்டும். அது அன்றாடம் மக்கள் பயன் படுத்தும் வகையில் அமைய வேண்டும். நடிகர் திலகத்தின் பால் பற்று கொண்ட பல கனவான்கள் உள்ளனர். அவர்களையெல்லாம் பயன் படுத்திக் கொண்டு உலகிலேயே முதல் தரமான நினைவிடமாக, ஆராய்ச்சிக்கூடமாக, நடிப்புக் கல்விக் கூடமாக, நூலகமாக, அமைய வேண்டும். நடிப்பைப் பற்றி எந்த ஐயப்பாடானாலும் விளக்கம் பெறக் கூடிய கல்விக்கூடமாக அது அமைவதே நடிகர் திலகத்திற்கு நாம் செய்யக் கூடிய சிறப்பாகும்.
நடிகர் திலகத்துடன் நெருங்கிப் பழகியவர்கள் உயிருடன் இருக்கும் போதே அவர்களையெல்லாம் பயன் படுத்திக் கொண்டு, அவர் படங்களையெல்லாம் கரைத்துக் குடித்த திரையுலக அன்பர்களைத் துணைக் கொண்டு சிறந்த முறையில் நினைவிடம் அமைப்பதே அவருக்கு நாம் செலுத்தும் மரியாதையாகும்.
தயவு செய்து நடிகர் திலகத்தின் சிலையானாலும் சரி, மணிமண்டபமானாலும் சரி, எந்த அரசையும் நாம் அணுகாமல் தனியார் துணைக் கொண்டு அமைப்பதே நல்லது. வெறும் விளம்பரத்துக்காவும், செய்தி வரவேண்டும் என்பதற்காகவும் இல்லாமல் எதிர்காலத்தில் எப்படி நினைவிடம் இருக்கும், இருக்க வேண்டும் என்பதையெல்லாம் ஆராய்ந்து செய்வதே ரசிகர்களாகிய நமது கடமையாக நான் நினைக்கிறேன்.
தயவு செய்து நடிகர் திலகத்தை பத்தோடு பதினொன்றாக, மற்ற அரசியல் வாதியாக எண்ணாமல் அவருடைய தனித்துவத்தை, அவருடைய மகிமையை நன்கு உணர்ந்து சிந்தித்து தொலைநோக்குடன் அணுகுவதே நம் முடைய அணுகுமுறையாக இருக்கவேண்டும் என்று வேண்டிக் கொள்கிறேன்.
அன்புடன்
ராகவேந்திரன்