Printable View
வரும் சனிக்கிழமை ஜூலை 11 அன்று நடிகர் திலகத்தின் திருஉருவ சிலை அரக்கோணம் நகரில் திறக்கபடுகிறது. இதை அமைத்திருப்பவர்கள் அரக்கோணம் நகர சிவாஜி மன்றத்தை சேர்ந்தவர்கள். தங்கள் சொந்த செலவில் இதை நிறுவுகிறார்கள். இதைப் பற்றி சொல்லும் போது மதுரையில் வெகு நாட்களாக தயாராக இருக்கும் நடிகர் திலகத்தின் சிலை கூடிய விரைவில் திறக்கப்படும் என்று நம்பகத்துக்குரிய செய்தி வந்திருக்கிறது. மேலும் விவரங்கள் விரைவில் வரும்.
அன்புடன்
சிலை என்று சொன்னாலே அரசியல் வரும். ஒரு நண்பர் சொன்னார். நடிகர் திலகம் வாழ்ந்த காலத்தில் அவரை குறை கூற வேண்டும் என்பதற்காக அவரது அரசியல் ராசி பற்றியெல்லாம் கிண்டலும் கேலியும் செய்யப்பட்டன. [பகுத்தறிவு பேசியவர்கள் தான் இதை செய்தார்கள் என்பது குறிப்பிட வேண்டிய விஷயம்]. சந்தர்ப்ப சூழ்நிலை காரணமாகவும், அன்றைய அரசியல் நிலவரம் காரணமாகவும் கூட்டணிகளின் பலம் பலவீனங்களே வெற்றி தோல்விக்கு காரணம் என்பதை மறைத்து சிலர் எழுதியும் பேசியும் வந்தார்கள்.
நிற்க, இன்றைய சூழலுக்கு வருவோம். நடிகர் திலகம் காங்கிரஸ் பேரியக்கத்திற்கு ஆற்றிய சேவையை மனதில் கொண்டு சத்யமூர்த்தி பவனில் அவரது உருவப்படத்தை, தான் தலைவராக இருக்கும் போது திறந்து வைத்தார் கிருஷ்ணசாமி. யாரோ சொன்னதை கேட்டு நடிகர் திலகத்தின் படத்தை [இடத்தை ரிப்பேர் செய்கிறோம் என்று வாஸ்துவின் மேல் பழியைப் போட்டு] அகற்றினார் தங்கபாலு. படம் திறந்த கிருஷ்ணசாமி இரண்டு மாதங்களுக்கு முன்பு தேர்தல் நடந்த போது அமோக வெற்றி பெற்றார். படத்தை அகற்றிய தங்கபாலு தோல்வியை தழுவியிருக்கிறார், நடிகர் திலகத்தின் ராசி என்றும் வெற்றி ராசிதான் என்று சொல்லி முடித்தார் நண்பர்.
அன்புடன்
Murali,Quote:
Originally Posted by Murali Srinivas
As you know, recently I was in Madurai when Raja was released at Meenakshi theater. Couple of things that make fans happy:
1. Raja posters were very attractive and looked new. Almost all posters only had NT in different costumes and styles - with a big caption saying Nadigar Thilagam Sivaji Ganesan in Raja.
2. NT Rasigar mandram made their own posters: Engal Sivaji-yin Raja. These posters were very visible across different parts of the city, especially near areas such as Munichalai - which is far from Meenakshi theater where the movie was released.
3. I was told crowd for Saturday night show was almost full.
Though I wanted to see the movie, due to my tight schedule, I could not make it. During my last visit to India in Feb, it was Engal Thanga Raja's turn and this time, it was Raja's. Coincidentally, both these Rajas were re-released in the same theater.
It shows Madurai fans always have a special place for NT and i am sure this will continue forever. It looks like both thilagam's are still ruling Madurai's re-release movies.
Thanks and regards.
Murali Sir, Very Good News.Quote:
Originally Posted by Murali Srinivas
So, within past three years, we have NT's Statues at...
Chennai :thumbsup:
Pudhuchery :thumbsup:
Nagerkoil :thumbsup:
Madhurai :thumbsup:
Thanjavur :thumbsup: and
Arakonam :thumbsup:
:redjump: :clap: :redjump: :clap:
நடிகர்திலகத்தின் ராசி என்றுமே வெற்றி ராசிதான் என்பதற்க்கு மற்றொரு சாட்சி,ஆட்சிக்கு வந்தால் நடிகர்திலகத்துக்கு சிலை வைப்போம் என்று தேர்தல் அறிக்கையில் குறிப்பிட்ட திமுக ஆட்சியை பிடித்ததும், ஆட்சிக்கு வந்த இரண்டே மாதத்தில் நடிகர்திலகத்தின் சிலையை திறந்த பிறகு நடைப்பெற்ற அத்தனை தேர்தல்களிலும் வெற்றி பெற்றதுமேயாகும்
'வைர நெஞ்சம்'
புதுமை இயக்குனர் ஸ்ரீதர் அவர்களால் சித்ராலயா நிறுவனத்தின் சார்பில் தயாரிக்கப்பட்டு, அவரால் இயக்கப்பட்ட இப்படத்துக்கு, முதலில் அவர் வைத்த பெயர் ‘ஹீரோ-72’. இப்பெயர் வைக்க முக்கிய காரணமாக இருந்தது 1972-ல் நடிகர் திலகத்தின் திரைப்படங்கள் அடைந்த தொடர் வெற்றிகள். இது பற்றி முன்பே நிறைய சொல்லிவிட்டோம். இப்படம் ஹீரோ-72 என்ற பெயரோடு, குறித்த காலத்தில் படப்பிடிப்பு முடிந்து, குறித்த காலத்தில் வெளியாகியிருந்தால் இப்படத்தின் வெற்றி வாய்ப்பு வேறு விதமாக இருந்திருக்கும். மிகக் காலம் கடந்து, வேறொரு பெயர் சூட்டப்பட்டு, ஏனோதானோ என்று வெளியானதால் எதிர்பார்த்த வெற்றியைப்பெறவில்லை.
ஸ்ரீதர் படங்களிலேயே, மிக அழகான, மிக இளைமையான, நடிகர்திலத்தை இப்படத்தில்தான் காணலாம். இத்தனைக்கும் அவர் படங்களிலேயே பின்னாளில் வந்த படம் (இதையடுத்து சில ஆண்டுகள் கழித்து, இந்த இருவர் கூட்டணியில் இறுதிப்படமாக மோகன புன்னகை வந்தது).
ஒரு பேங்கில் நடைபெறும் ஒரு கொள்ளையை மையமாக வைத்து, அதன் பின்னணியில் இயங்கும் ஒரு கொள்ளை மற்றும் கடத்தல் கும்பலை கதாநாயகன் வேட்டையாடிப்பிடிக்கும் கதை. வல்லவன் ஒருவன், எதிரிகள் ஜாக்கிரதை காலத்தில் வந்திருக்க வேண்டிய கதை. இதைவிட தீவிரமான துப்பறியும் கதைகளான ராஜா போன்ற படங்களை மக்கள் பார்த்து ரசித்தபின் வந்தது.
கதாநாயகி கீதா (பத்மப்ரியா)வின் தந்தை தான் சேர்மனாக இருக்கும் பேங்கிலேயே பணத்தைக் கையாடிவிட்டு தற்கொலை செய்துகொள்ள, பேங்கில் டைரக்டர்களில் ஒருவராக இருக்கும் அவரது மகனுடைய (முத்துராமன்) ஒத்துழைப்புடனேயே, ஒருகொள்ளைக்கும்பல் பேங்கைக்கொள்ளையடித்து, அவர் அப்பா செய்த கையாடலின் தடையத்தையும் மறைத்து அவரைக்காப்பாற்ற, அந்தக் கொள்ளைக்குமபலைப் பிடிக்கப் போராடி வெற்றிபெறும் கதாநாயகனைப்பற்றிய கதை. கொள்ளைக்கும்பலுக்கு உதவியாக இருந்த முத்துராமனின் நண்பன் (நடிகர்திலகம்) தான் அந்த துப்பறியும் அதிகாரி என்பதும், இன்னொரு நண்பன் (பாலாஜி) தான் அந்தக்கொள்ளைக்கும்பலின் தலைவன் என்பதும் கூடுதல் சுவாராஸ்யம்.
நள்ளிரவில் நடந்த கொள்ளையை நேரில் பார்த்த தன் தங்கையிடம், அந்த விவரத்தை யாரிடமும் சொல்லக்கூடாது, முக்கியமாக போலீஸிடம் சொல்லக்கூடாது என்று சொல்லும் முத்துராமன், சந்தேகத்தோடு பார்க்கும் தங்கையிடம், 'நீ கல்யாணம் ஆகாத பொண்ணு. தேவையில்லாமல் சாட்சி, கேஸ், கோர்ட்டுன்னு இழுத்தடிப்பாங்க. அதுக்குத்தான் மறைக்கச்சொன்னேன்' என்று சமாளிக்கும் இடமும், தன் நண்பன் ஆனந்த் தான் (நடிகர்திலகம்) கொள்ளையைக்கண்டுபிடிக்க வந்த அதிகாரி என்றறிந்து, தன் வீட்டில் தங்கியிருக்கும் அவரைக்கொல்ல தண்ணீர் பைப்பில் கரண்ட் ஷாக் வைத்தவர், அவர் ஆன் பண்ணப்போகும் நேரம் நட்பின் வேகத்தால் உந்தப்பட்டு, சட்டென்று மெயினை ஆஃப் செய்து காப்பாற்றும் இடமும் முத்துராமன் கேரக்டருக்கு பெயர் சொல்ல வைக்கும் இடங்கள்.
பத்மப்ரியா பல படங்களில் நடித்திருந்தபோதிலும் இந்தப்படத்தில் அவர் தோன்றும் அளவுக்கு அழகாக எந்தப்படத்திலும் வரவில்லை என்று சொல்லலாம். எல்லாவித நாகரீக உடைகளும் கச்சிதமாக பொருந்துகின்றன. டூயட் பாடல் காட்சிகளில் நன்றாக செய்திருக்கிறார். நடிகர்திலகத்துடன் முதலில் முறைத்துக்கொண்டவர் மெல்ல மெல்ல காதல் வசப்படுவது அழகான கவிதை. நடிகர்திலகத்தின் நடவடிக்கைகளில் சந்தேகப்படும் அவர், அவர் யாரென்று தெரிந்ததும், மனம் உருகிப்போவது டாப். (ஆனால் அவர் யாரென்று அறியும் நேரம், அவர் அண்ணன் முத்துராமனுக்கு உச்சகட்ட அதிர்ச்சி).
அவரது இளமைக்கு ஈடுகொடுத்து நடிகர்திலகம் செய்திருப்பதுதான் பாராட்டுக்குரியது. அழகாக ஸ்லிம்மாக இளமையாகத்தோன்றும் நடிகர்திலகம், தோற்றத்தில் மட்டுமல்லாது, நடிப்பிலும் சுறுசுறுப்பு. குறிப்பாக பத்மப்ரியாவை டீஸ் செய்து அவர் பாடும் பாடலில் நல்ல துள்ளல் மற்றும் துடிப்பு. சண்டைக்காட்சிகளிலும் அப்படியே. குறிப்பாக லாரிக்குள் ஜீப்பை ஏற்றி டூப்ளிகேட் போலீஸுடன் போடும் ஃபைட் கண்ணுக்கு விருந்து. (லொக்கேஷன், சோழவரம் கார் ரேஸ் மைதானமா?). 'செந்தமிழ் பாடும் சந்தன காற்று' டூயட்டிலும் நல்ல அழகு. இந்த மாதிரிக்கதைகளில் உணர்ச்சி மயமான நடிப்பைக்காட்ட வாய்ப்புகள் அரிதுதான். (ராஜாவின் கிளைமாக்ஸில் பண்டரிபாய் அடி வாங்கும்போது சிரிப்பதுபோலவோ, தங்கச்சுரங்கம் கிளைமாஸில் வரும் 'சர்ச்' காட்சியைப் போலவோ ஒரு காட்சியை இயக்குனர் வைத்து, ரசிகர்களை திருப்தி செய்திருக்கலாம்)
முத்துராமனுடன் நண்பனாக உறவாடிக்கொண்டே, கொள்ளைக்கும்பலின் தலைவனாகவும் உலாவரும் பாலாஜிக்கு போதிய வாய்ப்புகள் இல்லை. அவரது கூட்டாளியாக வரும் சி.ஐ.டி.சகுந்தலாவுக்கும் அப்படியே. ஆனால் சகுந்தலாவுக்காக வாணி ஜெயராம் பாடும் 'நீராட நேரம் நல்ல நேரம்' பாடல், மற்ற எல்லா பாடல்களையும் தூக்கி சாப்பிட்டுவிடுகிறது.
படத்தின் மிகப்பெரிய குறை, இம்மாதிரி படங்களுக்கு இருக்க வேண்டிய நட்சத்திரக்கூட்டம் போதிய அளவு இல்லாமல், ஏதோ ஓரங்க நாடகம்போல மூன்று நான்கு கேரக்டர்களை மட்டுமே வைத்துக்கொண்டு படம் முழுவதையும் நகர்த்த முயற்சித்திருப்பது. தவிர மந்தமான ஆரம்பம். மிகச்சிக்கனமான தயாரிப்பு. ஏர்போர்ட்டில் நடிகர்திலகம் வருவதாகக் காண்பிப்பதைக்கூட, சும்மா ஸ்டுடியோவில் இருட்டில் பத்துபேரோடு நடந்து வருவதாக காட்டி ஒப்பேற்றி விடுவார்கள். படம் பார்க்கும்போது, ஸ்ரீதருக்கு இப்படத்தில் நஷ்ட்டம் வந்திருக்க வாய்பில்லை என்றே தோன்றும். அதிக நாட்கள் ஓடாமல் இருந்திருக்கலாம். ஆனால் ஓடியவரையில் ஸ்ரீதருக்கு லாபமே கிடைத்திருக்கும். அந்த அளவுக்கு படத்தில் சிக்கனம்.
வைர நெஞ்சம் (2)
வாங்கிய காசுக்கு வஞ்சகமில்லாமல் உழைத்திருக்கும் மற்றும் இருவர் உண்டு. ஒருவர் ஒளிப்பதிவாள யு.ராஜகோபால். கண்ணில் ஒற்றிக்கொள்ளும்படியான ஒளிப்பதிவு. நைட் எஃபெக்ட் காட்சிகள் அதிகம் இருந்தபோதிலும் அத்தனையும் துல்லியம். இயக்குனர் ஸ்ரீதர் ஆச்சே.
இன்னொருவர் 'மெல்லிசை மாமன்னர்' எம்.எஸ்.விஸ்வநாதன் அவர்கள். பாடல்கள் அத்தனையும் அருமை.
1) பத்மப்ரியாவை டீஸ் செய்து சிவாஜி பாடும் முதல்பாடல்
' ஏஹே .... மை ஸ்வீட்டி...
என் பிரியத்துக்குரியவளே
இளம் பெண்களில் புதியவளே
நல்ல பருவத்தில் இளையவளே
என் பழக்கத்துக்கினியவளே'
('என் பழக்கத்துக்கு இனியவளே', ‘என் பழக்கத்துக்கு இனி அவளே' கண்ணதாசா, உன்னை புரிஞ்சிக்கறது ரொம்ப கஷ்டம்பா)
2) நடிகர்திலகம் - பத்மப்ரியா பாடும் டூயட் பாடல்..
'செந்தமிழ் பாடும் சந்தனக்காற்று
தேரினில் வந்தது கண்ணே'
மனதை இதமாக வருடும் அழகான மெலோடி. டி.எம்.எஸ். - சுசீலா வெற்றி ஜோடியின் இனிய குரலில் நம் மனதை அள்ளும். இப்பாடலை சென்னைக்கு அருகிலுள்ள ஒரு பீச் ரிஸார்ட்டில்தான் படமாக்கியிருப்பார்கள். ஆனால் ஒளிப்பதிவாளரும் இயக்குனரும் சேர்ந்து ஏதோ வெளிநாட்டில் படமாக்கிய உணர்வைத்தருவார்கள்.
3) சி.ஐ.டி.சகுந்தலாவிடமிருந்து கழுத்திலுள்ள டாலரை அபகரிக்க, நடிகர்திலகமும், பத்மப்ரியாவும் மாறுவேடம் போட்டுக்கொண்டு பாடி ஆடும் பாடல்...
'கார்த்திகை மாசமடி கல்யாண சீஸனடி
சாத்திரம் பாத்துக்கடி கண்ணாலே - இங்கு
மாலையை மாத்திக்கடி முன்னாலே'
பாடலில், மெல்லிசமன்னர் தவில் பயன்படுத்தி பாடலுக்கு அழகு சேர்த்திருப்பார்.
4) சூப்பர் டாப் பாடல், சகுந்தலாவுக்காக வாணி ஜெயராம் பாடிய..
'நீராட நேரம் நல்ல நேரம்
போராட பூவை நல்ல பூவை
மேனியொரு பாலாடை
மின்னுவது நூலாடை'
அதிலும் சரணத்தில்...
‘காலம் பார்த்து வந்தாயோ
கமலம் மலரக் கண்டாயோ..ஓ.... ஓ..... ஓ... ஓ....
கோலம் காணத்துடித்தாயோ
கூடல் வேதம் படித்தாயோ
நீயும் கண்டாய் என்னை
நானும் கண்டேன் உன்னை
போதும் இது நாம் கூட
போதையுடன் ஊடாட’
மெல்லிசை மன்னர் மிக அற்புதமாக மெட்டமைத்த பாடல். மக்களை அதிகம் சென்றடையாத பாடல். தொலைக்காட்சிகளுக்கு இப்படியொரு பாடல் தமிழில் வந்திருக்கிறது என்றே தெரியாத பாடல்.
(வி.ஐ.பி.தேன்கிண்னமெல்லாம் நான் இப்போது பார்ப்பது கிடையாது. அவர்கள் என்னென்ன பாட்டு போடப்போகிறார்கள் என்று என் பையனே லிஸ்ட் போட்டுவிடுவான். படகோட்டியில் ஒரு பாடல் (தரை மேல்), ஆயிரத்தில் ஒருவனிலிருந்து ஒரு பாடல் (ஓடும் மேகங்களே), எங்க வீட்டுப் பிள்ளையிலிருந்து ஒரு பாடல் (நான் ஆணையிட்டால்), பாசமலரிலிருந்து (மலர்ந்தும் மலராத), ஞான ஒளியிலிருந்து (தேவனே என்னைப்பாருங்கள்), திருவிளையாடலில் இருந்து ஒரு பாடல் (பாட்டும் நானே), புதிய பறவையிலிருந்து ஒரு பாடல் (எங்கே நிம்மதி)... டைம் முடிந்தது. 'எனக்கு இந்த நல்ல வாய்ப்பினை வழங்கிய '......' டிவிக்கு நன்றியைத் தெரிவித்துக்கொண்டு'.... அட போங்கப்பா.)
சரி, பாடகி திருமதி வாணி ஜெயராம் கலந்துகொள்ளும் டி.வி.நிகழ்ச்சிகளிலாவது இம்மாதியான பாடல்களைப் பாடுவாரா என்று ஆவலோடு காத்திருந்தால், அவர் மைக்கைப்பிடித்துக்கொண்டு ஆரம்பிப்பார் 'மல்லிகை என் மன்னன் மயங்கும்'... (அவர் 'மல்லிகை' என்று ஆரம்பித்ததும் 'ஆமா. இந்தம்மாவுக்கு இதைவிட்டால் வேறு பாட்டு தெரியாது' என்று ரிமோட்டைத்தேடுவோர் பலர். நல்ல பாட்டுத்தான், இல்லேன்னு சொல்லவில்லை. நாலாம் வகுப்பில் மீனாட்சி டீச்சர் திருக்குறள் நடத்தினார்.. 'பசங்களா, சொல்லுங்க 'பீலிபெய் சாகாடும் அச்சிறும் அப்பண்டம்....'). திருப்பி திருப்பி வாணியம்மா அதையே பாடும்போது, இவர் முப்பதாயிரம் பாடல் பாடினார்.. நாற்பதாயிரம் பாடல் பாடினார் என்பதெல்லாம் பொய்யோ என்று எண்ணத்தோன்றும்.
சரி, மெல்லிசை மன்னராவது என்றைக்காவது இதுபோன்ற 'தான் பெற்ற' அற்புதமான குழந்தைகளைப்பற்றி சொல்வாரா என்றால்.... ஊகும். அவரும் திரும்ப திரும்ப ஜெனோவா, சி.ஆர்.சுப்பராமன், நௌஷாத், எனக்கொரு காதலி இருக்கின்றாள், அறிஞனாய் இரு என்று அந்தக்கால கீறல் விழுந்த கொலம்பியா ரிக்கார்ட் போலவே பேசிக்கொண்டு இருக்கின்றார்.
சரி, படத்தைப்பேச ஆரம்பித்து டாப்பிக் எங்கோ போகிறது (இருந்தாலும் நான் சொன்னதெல்லாம் உண்மைதானே)
வைர நெஞ்சம் (3)
படத்தில் நடிகர்திலகம் - பத்மப்ரியா காதல் காட்சிகள் நல்ல் அழகோடும் இளமையோடும் அமைக்கப்படிருக்கும். (ஒருவேளை இந்தக் காட்சிகளை மட்டும் சி.வி.ஆர். இயக்கியிருப்பாரோ). பத்மப்ரியாவின் பெட்ரூமில் சிவாஜி கிண்டல் செய்துகொண்டிருக்க, 'ஐயோ, சீக்கிரம் வாங்க. அங்கே அண்ணன் டைனிங் ஹாலில் காத்துக்கிட்டிருக்கார்' என்று கெஞ்சும் பத்மப்ரியாவிடம், 'உங்க அண்ணன் சாப்பாட்டுராமன். டைனிங் ஹால்லதான் இருப்பான். நான் அழகை ரசிப்பவன் அதனால்தான் பெட்ரூம்ல இருக்கேன்' என்று சிவாஜி பதில் சொல்லும் இடம், இளமை கொஞ்சும் இதுபோன்ற இடங்கள் நிறையவே உண்டு.
1972-ல் துவங்கிய இப்படம், 1975 தீபாவளிக்கே ரிலீஸானது. இதே நாளன்று மற்றொரு படமான ஏ.சி.டி.யின் சினிபாரத் சார்பில் தயாரான 'டாக்டர் சிவா'வும் வெளியானது. (இரண்டு படங்களுக்குமே MSV-யின் பங்களிப்பு அபாரம்) சினிபாரத்தின் முந்தைய படங்களான பாபு, பாரதவிலாஸ் படங்களை மனதில் கொண்டு ரசிகர்களும் பொதுமக்களும் ரொம்ப எதிர்பார்த்தனர். மாவுக்கேற்ற பணியாரமில்லை. 'மன்னவன் வந்தானடி' பட வெற்றிக்குப்பின் சிறிது தேக்க நிலை, 'அன்பே ஆருயிரே'யிலிருந்து தொடங்கியது. இடையில் பெருந்தலைவரின் மறைவு ரசிகர் மத்தியிலும் நடிகர்திலகத்திடமும் ஒரு வெற்றிடத்தை ஏற்படுத்தியது. அந்நேரம் வெளியான இம்மூன்று படங்களோடு தொடர்ந்து வந்த 'பாட்டும் பரதமும்' உனக்காக நான் ஆகிய படங்களும் எதிர்பார்த்த வெற்றியைத் தரவில்லை. இத்தனைக்கும் இப்படங்களின் இயக்குனர்கள் எல்லாம் சாமானியர்கள் அல்ல. ஏ.சி.திருலோக்சந்தர், ஸ்ரீதர், பி.மாதவன், சி.வி.ராஜேந்திரன் என நடிகர்திலகத்துடன் இணைந்து பல வெற்றிகளை ருசித்தவர்கள்.
'வைர நெஞ்சம்' சிவாஜி ரசிகர்களால் புறந்தள்ளப்பட்டதற்கு இன்னொரு முக்கிய காரணம், இப்படத்தின் தயாரிப்பாளரும் இயக்குனருமான ஸ்ரீதர் இப்படம் தயாரிப்பில் இருந்தபோதே மாற்றுமுகாமுக்கு தாவி, வைரநெஞ்சம் வெளியாவதற்கு சரியாக ஒரு வருடத்துக்கு முன் ஒரு படத்தை தயாரித்து வெளியிட, அது மாபெரும் வெற்றியடைந்தது. அவ்வெற்றியின் மூலமாக தன்னுடைய கடன் தொல்லைகளில் இருந்து மீண்டதாக அவர் சொல்லப்போக, அது திரிக்கப்பட்டு, அவர் நடிகர்திலகத்தை வைத்து எடுத்த முந்தைய படம் மூலம்தான் கடனாளியானார் என்று மாற்று முகாமினரால் பரப்பப்பட, சிவாஜி ரசிகர்கள் வெகுண்டார்கள். அதனால் வைரநெஞ்சம் என்றொரு படம் தயாரிப்பில் இருந்ததையே மறந்தனர். அவர்கள் கவனம் முழுக்க டாக்டர் சிவாவின் பக்கமே இருந்தது. வைரநெஞ்சம் வெளியான ஓடியன் திரையரங்கில் ஒரு கொடி, தோரணம், பேனர் கூட கட்டப்படவில்லையாம்.
(இதற்கு நேர்மாறாக, 1971-ல் படப்பிடிப்பு துவங்கி, 1978-ல் வெளியான 'என்னைப்போல் ஒருவன்' படத்துக்கு ரசிகர்களிடமிருந்து ஏகோபித்த வரவேற்பு இருந்தது. வெளியான எல்லா திரையரங்குகளும் விழாக்கோலம் பூண்டன. படமும் வெற்றியடைந்தது).
ஆக, வெற்றிக்கான காரணங்களைவிட தோல்விக்கான காரணங்கள் விகிதாச்சரத்தில் அதிகம் இருந்ததால், வைரநெஞ்சம் ஏனோதானோ என்று வெளியாகி, ஏனோதானோ என்று ஓடி ஒருவழியாக ஐந்து வாரங்களை மட்டுமே கடந்தது.
இப்படிப்பட்ட படத்துக்கு நீ ஒரு கட்டுரை எழுதவேண்டுமா? என்று என்னைக்கேட்கலாம். ஆனால் வைரநெஞ்சம் (துவக்கத்தில் குறிப்பிட்ட காரணங்களால்) எனக்குப் பிடித்த படம் . தவிர, இப்படத்தைப்பற்றி வேறு யாரும் எழுதும் வாய்ப்புக்குறைவு. ஆகவேதான் எழுதுவோமே என்ற ஆசை. சர்ச்சைக்குரிய தகவல்கள் இருந்தால் பொறுத்தருளுங்கள்.
'வைரநெஞ்சம்' பற்றிய என்னுடைய பதிவைப்படித்த அத்தனை அன்பு இதயங்களுக்கும் என் நன்றி.
சகோதரி சாரதா அவர்களுக்கு,
நடிகர் திலகத்தின் மிக இளமையான தோற்றத்தில் வெளிவந்த வைரநெஞ்சம் படத்தைப் பற்றி எழுதியுள்ளதற்கு என் உளமார்ந்த பாராட்டுக்களைத் தெரிவித்துக் கொள்கிறேன். தோல்விப் படம் என்றாலும் நடுநிலையான ஆய்வளித்துள்ளீர்கள். இப்படம் மூலமாக அறிமுகமான பத்மப் பிரியா மேலும் கிட்டத்தட்ட 7 அல்லது 8 படங்களில் நடிகர் திலகத்துடன் நடிக்க வந்த வாய்ப்பை இழக்க நேரிட்டது. அதற்குக் காரணம் அவரல்ல. ஸ்ரீதர் அவர்களின் ஒப்பந்தம் காரணமாக அவர் நடிகர் திலகத்துடன் நடிக்க முடியவில்லை. அப்படி அவர் கோட்டை விட்ட அத்தளை படங்களும் நேராக மஞ்சுளாவுக்கு போய் சேர்ந்தன. மன்னவன் வந்தானடி, என் மகன், அவன் ஒரு சரித்திரம், அவன் தான் மனிதன் இவை யனைத்தும் பத்மப் பிரியா அணுகப் பட்டு ஸ்ரீதரின் ஒப்பந்தம் காரணமாக அவரால் நடிக்க முடியாமல் போன படங்களில் சில. மேலும் உதாரணங்கள் கூறலாம். மீண்டும் பிறகு தொடர்கிறேன். தற்பொழுது நம்முடைய இணைய தளத்தின் முகப்பில் இப்படப் பாடலைக் காணலாம்.
ராகவேந்திரன்
சாரதா,
நீண்ட நாட்களுக்கு பிறகு உங்களிடமிருந்து ஒரு படத்தைப் பற்றிய அலசல். நீங்களே குறிப்பிட்டது போல் அதிகம் பேசப்படாத வைர நெஞ்சம் படத்தைப் பற்றி.
நினைவுகள் பின்னோக்கி பயணிக்கின்றன. ஹீரோ- 72 ஆரம்பிக்கப்பட்ட நேரம். முழு பக்க விளம்பரங்கள். சித்ராலயா வார இதழிலும் முழு பக்க விளம்பரம். நடிகர் திலகத்தின் ஜோடியாக புதுமுகம் பத்மபிரியா அறிமுகம் என்ற செய்தி. யோசித்து பார்த்தால் நடிகர் திலகத்திற்கு ஜோடியாக அறிமுகமான புது முகங்களை விரல் விட்டு எண்ணி விடலாம். மாற்று முகாமில் புதுமுகங்கள் அறிமுகம் என்று அடிக்கடி செய்தி வரும் போது, இங்கே அது சுத்தமாக கிடையாது. எனவே இந்த செய்தி அந்த காலக் கட்டத்தில் புதுமையாக இருந்தது. ராகவேந்தர் சொன்னது போல பத்மபிரியா சித்ராலயா ஒப்பந்தத்தில் இருந்ததால் வேறு படங்களை ஒப்புக் கொள்ள முடியவில்லை. இந்த படம் காலதாமதமாகவே, ஸ்ரீதர் அவரை ஒப்பந்தத்திலிருந்து விலக அனுமதித்தார். பத்மபிரியாவும் காரோட்டி கண்ணன் படத்தில் தேங்காய் ஸ்ரீனிவாசன் ஜோடியாக அறிமுகம் ஆனார்.
படம் ஆரம்பித்து பாதி வளர்ந்த நேரத்தில் ஸ்ரீதரின் அலைகள் [விஷ்ணுவர்தன் தமிழில் அறிமுகம்] வெளியாகி பெரிய தோல்வியை சந்தித்தது. இதே காலக்கட்டத்தில் ஸ்ரீதரின் சித்ராலயா இதழும் விற்பனை குறைந்து அவரை பிரச்சனைக்குள்ளாக்கியது. அந்த காலக் கட்டத்தில்தான் மாற்று முகாமிலிருந்து அவருக்கு அழைப்பு. தசரா புல்லுடு என்ற தெலுங்கு படத்தை தமிழில் எடுத்து தர வேண்டும் என்று சொன்னவுடன் ஸ்ரீதரும் அதை ஒப்புக் கொண்டு போய் விட்டார். அதன் காரணமாக ஹீரோ- 72 படம் மீண்டும் தாமதமானது. போததற்கு இதே படத்தை இந்தியில் ஜிதேந்திரா - ஹேமமாலினி ஜோடியை வைத்து கேஹரி ஸால் என்ற பெயரில் எடுத்துக் கொண்டிருந்தார். தர்த்தி வெற்றிகரமாக ஓடியும் விநியோகஸ்தர்கள் ஏமாற்றியதால் பணத்தை இழந்த ஸ்ரீதர் இந்த முறை படம் சரியாக போகாததால் நஷ்டப்பட்டார்[ இந்திப் பதிப்பில் அமிதாப், முத்துராமன் வேடத்தில் நடித்திருந்தார் என்பது சிறப்பு செய்தி].
எல்லாம் முடிந்து படமும் பெயர் மாற்றப்பட்டு 1975 வருடம் நவம்பர் மாதம் 2ந் தேதி தீபாவளியன்று வெளியானது. படத் துவக்கத்தின் போது முழுப்பக்க விளம்பரம் கொடுத்தவர்கள் ரிலீஸ் அன்று அரைப்பக்க விளம்பரம் கொடுத்தனர். [அன்றைய நிலவரத்தில் சிவாஜி, எம்.ஜி.ஆர். படங்கள் ரிலீஸ் அன்று முழுப்பக்க விளம்பரமாக வெளி வர வேண்டும் என்பது எழுதப்படாத சட்டம்]. மதுரையில் Dr.சிவா சென்ட்ரலிலும் வைர நெஞ்சம் ஸ்ரீதேவியிலும் வெளியானது. நாங்கள் ஓபனிங் ஷோ Dr.சிவா பார்த்து விட்டோம்.இரவுக் காட்சி வைர நெஞ்சம் போவதாக பிளான். டிக்கெட் சொல்லி வைத்திருந்த ஆள் எங்கேயோ போய் விட நாங்கள் தியேட்டர் வரை போய் திரும்பி வந்தோம். மறு நாள் இரவுக் காட்சியும் அப்படியே ஆனது. மூன்றாம் நாள் இரவுக் காட்சி தான் பார்க்க முடிந்தது.
படம் அன்றைய படங்களை ஒப்பிடும் போது நீளம் குறைவான படம். அதிலும் நடிகர் திலகம் படம் ஆரம்பித்து 30 நிமிடம் கழித்து தான் திரையில் தோன்றுவார். படத்தில் சாரதா குறிப்பிட்ட குறைகள் மற்றும் திரைக்கு வெளியே நடந்த [மேற்சொன்னவை] படத்தை வெகுவாக பாதித்தது. படம் வெளியாகி ஐந்து வாரங்களுக்குள்ளாகவே பாட்டும் பரதமும் வெளியானது. எல்லாவற்றுக்கும் மேலாக நடிகர் திலகம் எடுத்த அரசியல் முடிவு, இவை அனைத்தும் சேர்ந்து கொண்டன என்கிறபோது படம் சரியாக போகாததில் வியப்பொன்றுமில்லை.
அன்புடன்