Quote:
இசைக் குடும்பத்தில் டி.வி. ஸ்டார்ஸ்
விஜய் டி.வி.யில் நேயர்களின் வெகுவான வரவேற்பைப் பெற்ற நிகழ்ச்சிகளுள் ஒன்று "இசைக் குடும்பம்'. இதில் பிரபல இசைக் கலைஞர்களை வைத்து இரண்டு குடும்பங்களாகக் குழு அமைத்து இசைப் போட்டி நிகழ்ச்சிகள் நடைபெறுகின்றன.
இதையடுத்து அலுவலகங்களுக்கிடையே இந்தப் போட்டி நடைபெற்றது. நல்ல குரல் வளம் படைத்த பார்வையாளர்களும் இதில் பங்கேற்க வாய்ப்பளிக்கப்பட்டது. அந்த வரிசையில் இனி வரும் வாரங்களில், டி.வி.தொடர்களில் நடித்து வரும் பிரபலங்கள், குடும்பங்களாக இந்த நிகழ்ச்சியில் பங்கேற்கிறார்கள்.
டி.வி.பிரபலங்கள் ராகவ், ப்ரீத்தா, தீபா வெங்கட், உமா பத்மனாபன், சந்தோஷி, கமலேஷ், சாய்ராம், விஷ்வா, பரத் கல்யாண், அலெக்ஸ், அர்ச்சனா, வேல்முருகன் ஆகியோர் தங்களுக்குள் குடும்பங்களை ஏற்படுத்தி நடுவர் முன் பாடுகிறார்கள்.
இதில் காமெடி, டூயட், ஆடலுடன் பாடல் என மூன்று சுற்றுகள் இடம்பெறுகின்றன. கடந்த முறை போட்டியாளராகப் பங்கேற்று அசத்திய முகமது அஸ்லாம், இந்த முறை நடுவராகப் பங்கேற்கிறார். யுகேந்திரன்-ஹேமமாலினி தம்பதியர் தொகுத்து வழங்க டி.வி. ஸ்டார்ஸ் பங்கேற்கும் புதிய இசைக் குடும்பம் நிகழ்ச்சி, ஞாயிற்றுக்கிழமை (நவ.9) இரவு 7 மணிக்கு விஜய் டி.வி.யில் ஒளிபரப்பாகிறது.