ஸ்ரீவள்ளி - தே மாங்காய்..
Printable View
ஸ்ரீவள்ளி - தே மாங்காய்..
தொடையை பற்றி எப்போது சொல்லித்தரப்போகிறீர்கள். ரம்பாவிற்கும் இதுக்கும் என்ன சம்பந்தம்? இப்ப சீர் பத்தி சொல்லிக்கொடுக்கறீங்க. நன்றி. காத்திருக்கேன்.
ஸ்ரீவள்ளி தேமாங்காயா நன்றி.
சரி.. இப்ப ஒண்ணு செய்யலாம்..
ரொம்பப் படிச்சாச்சுல்லியா சரி கொஞ்சம் வெளியே போய்ப் பார்ப்போம்..
சர் சர்ருனு சாலையில் வாகனங்கள் சென்று கொண்டிருக்கின்றன..அதில் இது என்ன
ஒரு அழகிய ப்ளாக் பி.எம்.டபிள்யூ..அதுக்குள்ள ஒரு காரிகை..
என்ன டிரஸ். ப்ளாக் லெக்கின்ஸ் பிங்க் கலர் டாப்ஸ்.. கண்ணில பார்ஷே க்ளாஸஸ்.. கூந்தல் பாத்தீங்கன்னா அப்பத்தான் அம்மணி நல்ல சன்ஸில்க் எக்*ஷாம்ப்பூ போட்டுட்டு க் குளிச்சு ஹேர் ட்ரை பண்ணியிருப்பாங்க போல..அந்த க்கரு கரு கூந்தல் பஃப்புனு நெளி நெளியா ப் பறக்கறது..ரொம்பப் பறக்காம இருக்கறதுக்குப் பின் கூந்தல்ல குட்டியா ஒரு பிங்க் ரப்பர் பேண்ட்..
சர்ருன்னு சீறும் பாம்பு போல சீறிப்பறந்த கார், காரிகை ஓரு செகண்ட்ல போய்ட்டாலும் மனசுக்குள்ள காலிங்க்பெல் அடிக்காமயே ஒக்காந்துட்டா பாஸ்..
கார்கால மேகமாய் கார்கூந்தல் தான் பறக்க
கார்தன்னை ஓட்டியவள் காண்
(இது வெண்பா மாதிரி இருக்கும் ஆனா இல்லை..ஏனெனில் ஆங்கிலக் கலப்பு வந்திருக்கே..)
இதுல முதல் வரில வர்ற கார் இரண்டாவது வரில வர்ற கார்.. இந்த இரண்டு ர் ருமே எதுகை..
முதல் வரில முதல் வார்த்தை கார்கால மூன்றாவது வார்த்தை கார்கூந்தல் இந்த ரெண்டின் முதலெழுத்து கா கா மோனை
இரண்டாவது வரில்ல கார்தன்னை , காண் இந்த முதல் வார்த்தை மூன்றாவது வார்த்தை மோனை..
இதுவே அந்தக்கால இளவரசி கருப்பு நிறப் பட்டில் சேலையுடுத்தி தேரில் கூந்தல் பறக்கப் போகிறாள் எனப் பார்த்தால்
கார்கால மேகமென கார்கூந்தல் தானலைய
தேர்கொண்டு சென்றாளே தேன்..!
இதுல தே தே மோனை
விளக்கமா அப்புறமா வாரேன்..
மீன்ஸ் தொடைங்கறது டைட்டில்.. அதுல்ல சப் டிவிஷன்ஸா இதெல்லாம் வரும் எதெல்லாம்..
தொடை என்பது
1)எதுகை,
2)மோனை,
3)இயைபு,
4)முரண்,
5)அளபெடை
என்று ஐந்தாக வகைப்படும்
//தொடையை பற்றி எப்போது சொல்லித்தரப்போகிறீர்கள். ரம்பாவிற்கும் இதுக்கும் என்ன சம்பந்தம்?// அந்தக் காலத்துல அவங்களுக்கு அது தான் அழகுன்னு பத்திரிகையில போட்டிருப்பாஙக்..!:)
எதுகையும் மோனையும் அடுத்தடுத்த வரிகளில் வரவேண்டுமா, இல்லை ஒரே வரியின் எந்தெந்த வார்த்தைகளில் வரவேண்டும்.
வரிகளுக்கும் அடிகளுக்கும் என்ன வித்தியாசம்?
கார்-ங்கறது தமிழ் இல்லையா? எல்லாரும் பேசறதுனால இதுவும் தமிழ்தானே!!! வேறு மொழி கலப்பிருந்தா வெண்பா இல்லையா? இப்பிடியே போச்சுன்னா யாரும் வெண்பா எழுத முடியாதே.
இப்போதைக்கு என்று ஆரம்பிப்பதற்கு முன்னால்.. ரொம்ப வருடங்கள் முன்னால் நடந்த சமாச்சாரம்..
என் நண்பரும் அவர் மனைவியும் தனது ஒரு அல்லது இரண்டு (சரியாய் நினைவிலில்லை)வயது மகனுக்கு ஆங்கிலத்தில் எதையாவது சொல்லித் தரவேண்டும் என தலையைப் பிய்த்துக் கொண்டு கடைசியில் ஒரு வார்த்தை சொல்லிக் கொடுத்தார்களாம்..அதை என்னிடம் ஃபோன் பண்ணிவேறு சொன்னார்கள்.. என்ன வார்த்தை extinguisher.! ஏன்னாக்க நண்பர் ஒரு நாளைக்கு முன்னால் அப்படி ஒரு பொம்மை வாங்கி வந்திருந்தாராம்..!
அது போல நானெழுதிப் பார்த்த எண்சீர் விருத்தத்தை வைத்துச் சொல்கிறேன்..
புரியு மெனநினைத்தால் புருவத்தை உயர்த்தித்தான்
...பூவை முகமாறி பல்வாறாய்க் கேள்விகளை
விரியும் பார்வையதன் மூல்மாகக் கேட்டிடுவாள்
...விழிகள் சிவந்திருக்கும் வேடிக்கை மறைந்துவிடும்
சரிதான் காத்திருப்பின் கஷ்டமென நானறிவேன்
..தங்கம் சின்னப்பூ ஜிஞ்சும்மா என்றாலோ
சுழிப்பாள் உதட்டினையும் பின்னங்கே வெடித்திடுமே
..சூறா வளியாகச் சொற்றொடர்கள் திட்டல்கள்..
இதுல் புரி விரி சரி சுழி இதுல வர ரி ரி ரி ழி எதுகைகள்
புரியும் - பூவை பு பூ
விரியும் விழிகள் வி வி
சரிதான் தங்கம் ச த
சுழிப்பாள் சூறா சு சூ இவையெல்லாம் மோனை..
(ஏதாச்சும் புரிஞ்சுதா :))
எதுகை அடுத்தடுத்த வரின்னு இப்போதைக்கு வச்சுக்கலாம்
மோனை அதே வரி முதல் முன்றாவது சீர்ல அதாவது முதல் மூன்றாவது வார்த்தையில்..
நன்னாப் புரியறது. நான் இவ்ளோ நாளும் ஒரே எழுத்து திரும்ப வாரதுதான் எதுகை மோனை-ன்னு நம்பிகிட்டு இருந்தேன். ர-வும் ழ-வும் எதுகையா வரும், ச-வும் த-வும் மோனைக்கு வரும்-னு நெனச்சது இல்லை. இந்த க்ரூப் என்னன்னு முழுசா சொல்லிடுங்கோ.
வல்லின எழுத்துக்களுக்குள்ளே எதுகை மோனைகள் வருமா? ச-வும் த-வும் வந்திருக்கிறது. ர-வும், ழ-வும் வருவதுபோல் எல்லா மெல்லின எழுத்துக்களுக்குள்ளும் இதுபோல எதுகை மோனைகள் எடுத்துக்கொள்ளலாமா? வாட் அபௌட் இடையினம்?
நன்னி
வர்றேன் வர்றேன்.. ரொம்ப அவசரப் படறீங்க.. நான் இன்னும் ஆரம்பிக்கவே இல்லியே..
**
என் குரு நாதர் பேராசிரியர் பசுபதி அவர்கள் தந்ததைக் கீழே தந்திருக்கிறேன்..
*
எதுகை – பேரா. பசுபதி.
எதுகை என்பது இருசீர்களின் இரண்டாம் எழுத்து ஒன்றுவது எனச் சொல்லலாம். காட்டுகள்: கற்று-பெற்று, பாடம்-மாடம், கண்ணன்-வண்ணன்.
ஆனால் எதுகைக்கு இரண்டாம் எழுத்து ஒன்றினால் மட்டும் போதாது. முதல் எழுத்துகளும் அளவில் ஒத்துப் போக வேண்டும். அதாவது முதல் எழுத்து குறிலானால், எதுகைச் சீரிலும் முதல் எழுத்துக் குறிலாக வேண்டும். நெடிலாக இருப்பின், எதுகைச் சீரிலும் நெடிலாக வேண்டு. (இது பலரும் செய்யும் தவறு). (எ-கா) தட்டு-பட்டு… எதுகை; ஆனால் தட்டு-பாட்டு எதுகையல்ல.
சிலசமயம், மூன்றாம் எழுத்து ஒன்றினால்தான் ஒத்த ஓசை கிடைக்கும் (எ-கா) பண்டு- உண்ண ஓசையினிமை இல்லை. பண்டு, கண்டு, உண்டு இவை மிகச்சரியான எதுகைகள். அதனால் முதல் எழுத்து அளவில் ஒன்றி, முடிந்தவரை மற்ற எழுத்துகள் ஒன்றுவது சிறப்பு; குறைந்தபட்சம் இரண்டாவது எழுத்தாவது ஒன்ற வேண்டும்.
சில சிறப்பில்லா எதுகைகளும் உண்டு. இவற்றில் முக்கியமானவை வருக்க எதுகை, இன எதுகை, ஆசிடை இட்ட எதுகை.
வருக்க எதுகை
உலகம் யாவையும் தாமுள வாக்கலும்
நிலைபெ றுத்தலும் நீங்கலும் நீங்கலா
அலகி லாவிளை யாட்டுடை யாரவர்
தலைவ ரன்னவர்க் கேசரண் நாங்களே!
மேலே ல-விற்கு லை-எதுகையாக வந்திருக்கிறது. இப்படியே ல,லி,லு,லெ, லோ இவையும் வரலாம். ல-குறிலாதலால் குறிலாகவே வருதல் சிறப்பு. லை-நெடிலானாலும், லய் என்பது போலவே குறிலாக ஒலிக்கிறதல்லவா? ல-விற்கு அதன் வருக்க எழுத்துகளில் ஒன்று எதுகையாக வருவது வருக்க எதுகை.
இன எதுகை
இரண்டாம் எழுத்துகள் ஒரே இனமாக இருப்பது.
(எ-கா) வல்லின எதுகை
தக்கார் தகவிலார் என்ப தவரவர்
எச்சதாற் காணப் படும் (திருக்குறள்)
அதே போல அன்பு, நண்பு மெல்லின எதுகை
வரவு,செலவு இடையின எதுகை
ஆசிடை இட்ட எதுகை
ஆசு என்றால் பற்றுக் கோடு. எதுகையாக வரும் எழுத்துக்கு முன் ய், ர், ல், ழ் என்ற எழுத்துகள் நான்கில் ஒன்று வந்தால் ஆசிடை இட்ட எதுகை எனப்படும். இந்த விதியினால், வாய்மை-தீமை, மாக்கொடி-கார்க்கொடி, ஆவேறு-பால்வேறு, வாழ்கின்ற-போகின்ற என்ற சொற்கள் ஆசிடை எதுகை பெற்று விளங்குகின்றன. இந்த எழுத்துகள் நடுவில் வந்தாலும் ஓசை கெடுவதில்லை என்பது இந்த விதியின் உட்பொருள். (வாய்மை-தூய்மை, மாக்கொடி-பூக்கொடி, வாழ்கின்ற-தாழ்கின்ற… இவை முதல்தரமான எதுகைகள். ஆனால் கருத்தைச் சொல்ல, முதல்தர எதுகைகளைப் பயன்படுத்த முடியாவிட்டால், ஆசிடை இட்ட எதுகை போன்ற சிறப்பில்லா எதுகைகளைப் பயன்படுத்தலாம் என்பதே இந்த விதிகளின் பொருள்.
சொற்புணர்ச்சி செய்தபின் தான் எதுகை சரியாவென்று பார்க்க வேண்டும். மின்னியல் பொன்தகடு எதுகை அல்ல. ஏனென்றால் பொன்+தகடு = பொற்றகடு.
ஒரு எடுத்துக் காட்டு.
வெய்யிற் கேற்ற நிழலுண்டு
…..வீசும் தென்றல் காற்றுண்டு
கையிற் கம்பன் கவியுண்டு
…..கலசம் நிறைய மதுவுண்டு
தெய்வ கீதம் பலவுண்டு
…..தெரிந்து பாட நீயுண்டு
வையம் தருமிவ் வளமின்றி
…..வாழும் சொர்க்கம் வேறுண்டா? (கவிமணி தே.வி. பிள்ளை)
இது அறுசீர் விருத்தம்; நாலு அடிகள் எட்டு வரிகள். முதல் நான்கடிகளின் முதற்சீர்களில் ஒரே எதுகை (வெய்யி, கையி, தெய்வ, வையம்)
வரிகளுக்குள்ளே மோனை (வே-வீ, கை-க, தெ-தெ, வை-வா) – இங்கு ஐ-சீரின் முதலிலும் அய் என்று குறிலாக ஒலித்து எதுகைக்குப் பயன்படுவதைப் பாருங்கள். பொதுவாக எதுகை மரபுக் கவிதையில் அடிகளைப் பிரிக்க உதவும். அடிகளுக்குள் பொதுவாக மோனை நயம் இருக்கும். ஓசை அழகிற்காக, படிக்காதவர்களும் எதுகையை ஆள்வதைப் பார்க்கலாம். எதுகை-மோனை= எகனை-மொகனை என்றாகும். ஆட்டம்-பாட்டு=ஆட்டம்-பாட்டம் ஆகும். விதையொன்று போட்டால் சுரையொன்று காய்க்குமா என்பது வெரை ஒண்ணு போட்டா சொரை ஓண்ணு காய்க்குமா என்றாகும்.
**
இன்னும் விளக்கம் நான் தருவதற்கு கேன் வி வெய்ட் டில் ஈவ்னிங்க்..:)
மோனை – பேரா.பசுபதி
மோனை: ஒரு சொல்லுக்கும்
இன்னொரு சொல்லுக்கும் முதலில் உள்ள எழுத்துகள் ஒத்த ஓசையுடன் இருப்பது மோனை.
(கண்ணைக் கட்டிக் காட்டில் விட்டாயே! என்ற சொற்றொடரில் க-க-கா)
உயிரெழுத்தில் மோனை
அ,ஆ, ஐ, ஔ – ஓரினம்
இ, ஈ, எ, ஏ – ஓரினம்
உ,ஊ,ஒ,ஓ – ஓரினம்
காட்டுகள்:
அகல உழுவதை ஆழ உழு (1-3 சீர்கள் பொழிப்புமோனை)
இருதலைக் கொள்ளி எறும்பு போல (1-3)
ஓட்டைச் சங்கால் ஊத முடியுமா? (1-3)
உயிர்மெய்யில் மோனை
க,கா, கை, கௌ – ஒரே இனம்
கி,கீ, கெ, கே – ஒரே இனம்
கு,கூ, கொ, கோ – ஒரே இனம்
ப,பா, பை,பௌ – ஒரே இனம்
…. இப்படியே
சில விசேஷ இனங்கள்:
ச-த ஒரே இனம். (எ.கா) தொட்டிற் பழக்கம் சுடுகாடு மட்டும் (தொ-சு -மோனை)
ம-வ ஒரே இனம். (எ-கா) வளர்த்த கடா மார்பில் பாய்ந்தது (வ-மா- மோனை)
ந-ஞ ஒரே இனம்.(எ-கா) நலிந்தோர்க்கில்லை ஞாயிறும் திங்களும் (ந-ஞா- மோனை)
பழம் நூல்களில் யா-விற்கு – இ, ஈ, எ, ஏ மோனை என்பர்.
தற்காலத்தில் – யாவிற்கு அ, ஆ, ஐ, ஔ-வும் சொல்லலாம்.
ஜ-ச, த – ஓரினம்; ர-ல — இ, ஈ, எ, ஏ மோனை இனம்.
ஒரு பழம் வெண்பா மோனை வாய்பாடினை நினைவுறுத்த:
அகரமொடு ஆகாரம் ஐகாரம் ஔகான்
இகரமொடு ஈகாரம் எஏ – உகரமொ(டு)
ஊகாரம் ஒஓ; ஞந, மவ தச்சகரம்
ஆகாத அல்ல அநு.
கோல மலருக் குள்ளே மணமுண்டு! (மோனையா?) – பார்த்தால் கோ-கு மோனை போல
இருக்கிறது. ஆனால் இது மோனை இல்லை. ஏனென்றால், அங்கே இருக்கும் சொல் – உள்ளே:
ஆதலால் கோ-உ மோனை இல்லை.
நாலு நீர் அடிகளில் 1-3 சீர்களில் பொழிப்பு மோனை இருப்பது சிறப்பு.
மேற்கூறியவற்றிலிருந்து தொகுத்த மோனை
அட்டவணை:
அ,ஆ,ஐ, ஔ, யா (தற்காலம்)
க,கா, கை, கௌ
ச,சா, சை, சௌ, த,தா, தை, தௌ, ஜ, ஜா
ந, நா, நை, நௌ, ஞ, ஞா
ப,பா, பை, பௌ
ம,மா, மை, மௌ, வ, வா, வை, வௌ
இ, ஈ, எ, ஏ, ர, ல (யா, பழம் நூல்களின் படி)
கி, கீ, கெ, கே
சி, சீ, செ, சே, தி, தீ, தெ, தே, ஜி, ஜீ, ஜெ, ஜே
நி, நீ, நெ, நே, ஞி, ஞீ, ஞெ, ஞே
பி, பீ, பெ, பே
மி, மீ, மெ, மே, வி, வீ, வெ, வே
உ, ஊ, ஒ, ஓ
கு, கூ, கொ, கோ,
சு, சூ, சொ, சோ, து, தூ, தொ, தோ, ஜு, ஜூ, ஜொ, ஜோ
நு, நூ, நொ, நோ
பு, பூ, பொ, போ
மு, மூ, மொ, மோ
இக்காலத்தில் இப்படியும் வரலாம் (யயாதி..)
மற்றவையும் அப்படியே லாடம், இத்யாதி.
(பேரா.பசுபதி)